Meta-in an hnuaia hnathawk mi 11,000 a ban ; "Ka thiam loh a ni" - Mark Zuckerberg

Meta Platforms Inc chuan Nilaini khan an hnuaia hnathawk zinga 13%, mi 11,000 chuangte chu an ban dawn tih sawiin, Facebook chuan thil man sang leh advertising market tlahniam zel avangin tech company-in ṭum khata an hnathawk an chawlhtir tam ber zinga mi niin Reuters chuan a tarlang. Tech Company lian, Twitter leh Microsoft Corp-te pawhin an hnathawk mi ṭhahnem tak an lo ban tawh bawk.

Covid-19 hripui len laia tech company ṭhangduang tak ṭhin kha tunhnai chhoah thil man sang, inflation leh interest rate pung chak tak avangin an hlutna hi an rin phak bakin a tlahniam mek a ni.

Meta hian an share hmun thuma ṭhena hmun hnih an hloh tawh a, inrenchem zawnga hmalak zel an tum thu an sawi. Elon Musk-an Twitter-a thuneitu ber dinhmun a chelh hnuah, an company her danglam tumin mi 7,500-te chu kar hmasa khan a lo ban tawh bawk. Musk chuan eng ti ang ang chiahin nge an pawisa hloh tih tarlang lo mah se, "Kan company-in ni tin USD mtd 4 kan hloh ziah a nih chuan hnathawk lai ban mai loh chu thutlukna dang ka nei lo," a ti.

META CEO Mark Zuckerberg chuan Meta-a hnathawkte hnenah thuchah sawiin, "Vawiin hian Meta chanchina inthlak danglamna nasa ber ka puang dawn. Kan hnathawkte chu 13% vela titlemin, kan hnathawk talent nei ṭha tak tak mi 11,000 chuang kan chhuahtir a ngai tlat mai. Heng kan thlenna chhanah hian mawhphurtu ber ka ni a, ka thutlukna avang hian ngaihdam ka dil a. Mi tin tan a harsa dawn tih ka hria, chuvang chuan ka inthiam lo takzet a ni," tiin an tlakhniam chhanah amah chu mawhphurtu a nih thu a sawi. Zuckerberg chuan thla ruk chhung chu an hnathawkte hamṭhatna pek chhunzawm a tum thu a tarlang bawk a ni.