TBC-a leh PKB-a ten US-ah rawngbawlna nei mek

Zaithiam TBC Zaithanpuia leh PBK Liankhuma te chuan USA-ah rawngbawlna an nei mek a, an rawng­bawlna hian ngaihhlut a hlawh hle.

TBC-a te ṭhian dun hian October 23 khan Aizawl chhuah­sanin US an pan a, kum­thar January thlaah lo haw leh an tum. An cham chhung hian hmun hrang hrangah rawngbawlna an nei dawn a, zai mai piah­lamah Pathian thu sawite pawh­­­­in hmun hrang hrangah an kalkual a ni. November 3 - 4 chhung khan Lai churh, Chicago-ah hun an hmang a, an rawngbawlna hi a hlawhtling thawkhat hle. Hemi hnu hian Myanmar Christian Church of Metro Chicago (MCCMC)-ah hun an hmang leh a, Hebrew Ministry, Indianapolis-ah sawm an nih angin hun an hmang leh bawk.

November 11 khan Indy-ah Gospel Concert an buatsaih a, Indy-ah hian a tuk thlengin CEBC leh Mizo Methodist Church-te nen hun an hmangho zui a ni. Pathianni zan vek khan Gospel Concert hi an chhunzawm leh bawk.

November 19 aṭangin In­dy-a Falam Baptist Church-ah hun an hmang leh dawn a, November 25 aṭangin Maryland-ah programme an nei zui ang. Maryland-ah hian Mizo United Methodist-ah rawngbawlna an nei dawn a, December thla tir thleng proramme duansa a awm. Hemi hnu hian Kentucky Mizo Methodist Church leh Indiana Mizo Presbyterian Church-ahte rawngbawlna hi neih leh tura ruahman a ni.

PBK-a leh TBC-a hian US-ah hian Krismas an hmang dawn a, nakkum lamah lo haw an tum chauh. Kum tir aṭangin rawngbawlna tur programme an nei sa a, Mizo Christian Churh, Indianapolis-ah hun an hmang ang. An rawngbawlna hian hlut a hlawh hle a, Mizo mai bakah US-a Lai awmte pawhin an hlut a, Mizo ṭawng thiam chiah lote hnenah pawh ṭawnglet chawpte pawhin rawngbawlna hi an kalpui a ni.

TBC-a chuan, "Pathianin kan rin phak bakin mal min sawm a, kan rawngbawlnain hlut a hlawh hle a ni. Mizo ṭawng thiam chiah lote hnen aṭang pawhin sawmna kan dawng nasa a, crusade tura sawmna pawh kan dawng nual a ni. Kan rawngbawlna min hlutsak avangin kan lawm takzet a, keini tih theih a ni lo a, Pa­thian vang chauh a ni" tiin lawm­thu a sawi. TBC-a hi sorkar hnathawk ni mah se, a puten hrethiam taka chawlh an pek avangin lawmthu a sawi bawk.

TBC-a leh PBK-a te hi Indy Praise & Worship kaltlanga rawngbawl tura sawm an ni a, rawngbawlna an neih thu hriate chuan an sawm zui nghal hlawm a ni. A mala sawm an nih pawhin inphatsan loin an inṭawiawm zel a ni.