REVOLUTION IV III Sovereign & Boomarang-te hun a thleng dawn ta ; Guest Band : Glimpse of Revolution

Tribal Tone Scavenger chuan zanin dar 7:00 hian Vanapa Hall-ah i tan liau liau Revolution IV an chhawp chhuak leh dawn e.

Revolution IV-a live music ruai min ṭheh sak turah hian hlawhchhamna leh retheihna in a bawh beh zawh loh band III Sovereign, Boomarang leh Glimpse of Revolution te an inlan dawn.

Heng band pathum te hi Rs 300 chauh sengin an chetla laite hmuin kan ngaithla thei tur hi kan vannei takzet a. Rimawi lama tui mi tan hmaih phal chi zia zang a ni lo.

Hlawhtlinna kawng an zawhna kawngah pawh III Sovereign hi phai lama an chhuk thlak tirh phei chuan Hotel emaw lodge nuamah emaw thlenna tur pawisa pawh nei loin, Mizoram House garage-ah te an riak ve naw naw ṭhin, Boomarang pawh mahni sum seng in, nei leh nei lova bul ṭan ve nawk nawk an ni. Chutiang bawk in Glimpse of Revolution pawh harsatna tam tak paltlangin Winner an rawn ni haw. Heng an zinkawng bum boh tak kara rawn hlawhtling thei band te thu leh hla, rimawia siam chhuah hi a theuneu lo in, a namai lo viau ang tih hi ringhlel suh.

Djent leh Metal thlipui hmang a Glimpse of Revolution leh III Sovereign ten min nuai harh hawk hnuah, music lam a damdawi ṭha mi hmangin Boomarang ten min han hahdam tir leh sawng sawng tur te hi a tel ve lo nih uiawm tak a ni dawn. Hma hun a hriat loh, concert khap leh thut a ni thei, puipun a rem lo leh thut thei bawk, chuvangin rimawi ngaina tan tun hun bak a hun rangkachak a awm chuang lo. Hnam dang zawk ten an ngaihsan leh duh em em kan tualchhung band te hi kan support zia lantirna hun a ni dawn lawm ni?