Aizawl-ah International Electronic Music Festival ; Khawvel huap DJ ṭha Aizawlah an inlar dawn!
Annual International Electronic Music Festival, 'Femme Razzmatazz' chu a vawi khatna atan Mizoram-ah December 1-2 hian neih a ni dawn.
Mizoramah hian concert lian tham buatsaih a ni tawh ṭhin a, khawvel huap zaithiam larte pawh an lo inlan tawh a; nimahsela DJ langsar chin hi chu an vawi khat lo kalna tur a ni ang.
He mega event neih tura main organiser, Country Head Innovations India-a an hotu Asish Mishra chuan, Femme Razzmatazz hi Mizoramin International Electronic Music Festival a thlen hmasak ber tur a nih thu sawiin, hmun danga festival pui taka an lo kalpui ṭhin kalphung anga kalpui a nih tur thu a sawi.
Ni hnih awh tur festival-ah hian International DJ - South Africa aṭangin Candice Reddign leh, Poland aṭangin Nina Suerte te chahchhuah an ni dawn a; Neon Theme setting hnuaiah AR Ground (Cinema Hall kawt)-ah performance ropui tak kan hmu dawn a ni.
Tunlai khawvelah rimawi kalphung a inthlak a, tun hmaa mipui ngaihven ni lem lo DJ-te chu an langsarin zuitu leh ngaisangtu an nei ngah a, an hlawh a san bakah an lar hle - Mizoramin a la hmuh ngai loh leh a la tawn zen zen loh boruak thar a tawng dawn a ni.
En man hi tihchian la ni lo mah se a senso a san dawn avangin en man hi a hniam dawn lo niin a buatsaihtu lam chuan an sawi a, khawvel pum huap DJ langsarte che vel chhim phakin chhawp hnaih a ni dawn.
He event neih tur hi Innovations India Advertising & Events Pvt. Ltd.-in Mizorama an hmalakna lian tham hmasa ber tur a ni. Mizoram mipuite tan international level entertainment chhawpchhuah an tum. Vanglaini, Zonet, Airtel leh Red FM-te an thawhpui ang.