Ṭhazual Award 2022 Lengzem zan hman zawh a ni ta

Ṭhazual Award 2022 zan hnihna, Lengzem category chu Zirtawpni zan khan hlawhtling taka semchhuah a ni leh ta. SaiWanah leh Henz-ten an hla hit 'Ṭhian' hmanga show rawn khuh hawngin, he zan hi a tana duan tih tur khawpa host zei, Rini Hlondo chuan show hi a kaihruai. Kum ṭha hmangtu SaiWanah chuan category pahnihah award dawngin a langsar ber a, Best New Artist bakah Song Of The Year a dawng.

Tunlai band active ber pawl, The Prophets chuan Band of the Year an dawng a, kumina zaithiam zinga rawn invawrh leh thawm nei lian ber tiha sawi ngam SaiWanah hnenah Best new artist hlan a ni.

Michelle Varte hla hit, John Mawitea leh Mapuii Fanai hla phuah 'Nachhawkna' chuan Best music video a dawng a, he video hi Moonshine Studio kutchhuak a ni.

Alex Hauhulh leh JH Peka chuan Zoram mipui lamtirtu "Lam dun i la" hmanga an thawhdunna avangin Best Group/Duo chawimawina an hum haw a, a hla phuah apiang a hit zel amaw tih mai tur khawpa thiam Rpa Ralte hnenah Best Songwriter hlan a ni.

SDO lama min lam tirtu K. Hminga'n Best Male Artist a dawng a, zaithiam leh hlaphuahthiam, Zoram hmun hrang hranga hlawhtling taka 'Homecoming Tour' buatsaihtu Zaii Hauchhum chuan Best Female artist a hum haw.

Kumina hla hit ber tiha sawi ngam, naupang aṭanga nu leh pa thlenga kan sak theih Saiwanah ft Omomi-te hla "Tui leh Mei" chuan a phu ang ngeiin Song of the year award a dawng bawk a ni.

Zaithiam chuai thei lo, hranghlui ni lo, hrang mek Michelle Varte performance a ṭha a, mipui nghahhlelh 'Best New Artist' nominee Guru Gee chu a vawi khatna atan stage lianah a rawn inlan bawk. Mizo Idol 2022 Hmangaihi chu hemi zana perform ṭha ber ti ila mi tam zawkin min ṭawmpui ang.