Zofa Lelte 2022 pakhatna Zenngaihsang

Zoram Thar Zofate Lairelna Inpui (NGO) in a buatsaih, Zofa Lelte 2022 chu hmawr bawk a ni ta. Finalist mi 10-te aṭangin Lamka, Manipur nula Zenngaihsang chu thlangin Rs. 3,00,000 a dawng. Pahnihna hi Chhingchhip nula Angeli Lalruatpuii niin, pathumnaah Sonia Lamngaichin, Dumlian, Manipur thlan a ni.

September thla aṭangin Zofa Lelte 2022 Audition round hi neih ṭan a ni a, Mizoram chhung District 10 bakah, Myanmar leh Manipur ah audition huaihawt a ni. Online-in audition hi buatsaih a ni bawk. Zo hnahthlak ṭawng hrang hrangin contestant te an zai a, hei hian Zofate hi hnam khat, thlah khat kan ni tih nemnghetin, Kristaah leh hnamah contestant te leh mipuite min ti pumkhat leh zual a ni tiin show buatsaihtute chuan an sawi.

Zofa Lelte tum ber Kristaa Hnam inpumkhat chu a hlawhtling tiin Zoram Thar Zofate Lairelna Inpui hruaitu, Rev. Dr. Zaichhawna Hlawndo chuan lawmthu sawina hun a hmang. A hla phuah ‘Tu dang kan nilo Zosefa tu leh fate kan lo ni’ tih chu theme song ah hman niin, Top 10-ten result puan zanah a huho in an ṭawng ṭheuhin an sa bawk. Zofa Lelte 2022 main judge Vanlalsailova, Hlimhlimi leh Jeff Akai Haokip-te bakah nikum online Zofa Lelte 2021 winner Vanpangpari te chuan result puan zanah zaiin mipui an awi tlei bawk a ni.