Kum 25 hnuah Pokemon Ash Ketchum world champion a ni ta!

Tlai dar 5 a rik apianga Cartoon Network Channel kan hmehchhuah na chhan, Pokemon anime series-a changtupa Ash Ketchum chuan kum 25 chhung khawvela Pokemon trainer ṭha ber ni tura a beih hnuah, world champion title chu a nei thei ta. Kum 25 liam taa episode hmasa ber an tihchhuah laia kum 10 mi, Ash-a chuan Zirtawpni khan Netfl ix series, 'Pokémon Ultimate Journeys'-ah Pokemon World Championshipah pakhatna a ni a, Mizorama anime series lar ber zinga mi ngainatute tan chuan an naupan lai chhui let tir tu a ni ngei ang le.

Pokemon official account chuan Ash-a pual hian lawmpuina thu ziakin,"A hlawhtling ta! Ash-a chu World Champion a ni!," tiin 'like' nuai 5 dawn a nei tawh a ni. He episode hi Japan-ah pekchhuah hmasak ber a ni a, khawvel pumah tihchhuah leh tura ruahman a ni.

Pokemon anime series hi kum 1997 aṭang khan an tichhuak ṭan a, Ash chuan a tum ram thleng tur hian kum 25 zet a bei. Ash leh Pikachu hi season tharah an zinkawng an chhunzawm leh dawn em tih tarlan a la ni lo thung.