Latin Grammy Award-ah Luis Fonsi a langsar
Latin Grammy Award chu Ningani zan khan MGM Grand Garden Arena, Las Vegas-ah sem a ni a, Luis Fonsi a langsar hle.
Award sem zan hian thlipui, Hurricane Maria-in a nuai avanga Puerto Rico mipuite chunga harsatna nasa tak thleng tawrhpuina hun hman a ni. Puerto Rican star Luis Fonsi chuan award a dawn chu an ram mipuite tan a hlan thu a sawi a, harsatna tawkte chu a tawrhpui takzet tih a sawi. "Puerto Rico mipuite tan ka tih tur ka ti tawh a, tih tur awm apiang ka ti zel bawk ang. Mipuiten ṭanpuina an mamawh takzet a, an harsatna tawh aṭanga tungding leh turin theihtawp ka chhuah dawn a ni" tiin, an ram mipuite a thlamuan.
Luis Fonsi hian an ram mipuite ṭanpuina tur hian sum eng emaw zat a lo thehchhuak tawh bawk a ni. Award dawngtute chuan Puerto Rico mipuite an tawrhpui thu an sawi a, an award dawn hi thlipui tleh vanga vanduaina tawkte tan an hlan thu an sawi hlawm a ni.
Luis Fonsi chu mipui lawm hlawh ber zinga mi niin, Daddy Yankee nena an hla sak 'Despacito' chu 'Record of the Year' leh 'Song of the Year' atan thlan a ni. 'Despacito' hi a hit rem rem hle a, youtube-ah viewer 4,326,104,431 zet an awm tawh a, 'Song of the Year' atana thlan a ni hi a mak lo. Category pali-ah award dawng thei tura chhawpchhuah a ni nghe nghe. Award sem zan hian Fonsi chuan 'Despacito' hi a sa a, mipui thawm a ring hle.
Award sem zan hian Puerto Rican rapper Residente pawh a perform a, a T-shirt-ah an ram mipuite tawrhpuina thu ziakin, an flag a pawtpharh bawk.
Residente hian award pahnih a dawng a ni. Award dawng zingah Shakira leh Vicente Garcia pawh an tel.
Alejandro Sanz chu special award hlna a ni a, a ni hian US President Donald Trump chu 'Deferred Action for Childhood Arrivals' program ngaihtuah ṭha leh tura a duh thu a sawi. Sanz hian ramdang mi naupangte an nih lai aṭanga US-a seiliante hnena khua leh tui nihna pek chu a thlawp thu a sawi a ni.
18th Annual Latin Grammy Award Winner
Album of the Year : Salsa Big Band - Rubén Blades con Roberto Delgado & Orquesta
Record of the Year : Despacito - Luis Fonsi featuring Daddy Yankee
Song of the Year : Despacito - Daddy Yankee, Erika Ender and Luis Fonsi
Best New Artist : Vicente Garcia
Contemporary pop album : El Dorado - Shakira.
Urban music album : Residente - Residente.
Urban song : Despacito
Traditional pop vocal album : Salon, Lagrimas y Deseo - Lila Downs
Rock album : La Gran Oscilacion - Diamante Electrico.
Alternative album : Jei Beibi - Cafe Tacvba.
Salsa album : Salsa Big Band - Ruben Blades con Roberto Delgado & Orquesta
Folk album : Musas - Natalia Lafourcade.
Latin jazz album : Dance of Time - Eliane Elias.
President's merit award : Lin - Manuel Miranda.
Person of the year : Alejandro Sanz