Miss World 2017 Manushi Chhillar ; India-in kum 17 hnuah Miss World title a kawl ve leh ta
Haryana nula Manushi Chhillar chu Miss World atan thlan a ni.
Kum 17 chhunga India-in Miss World a neih leh vawi khatna a ni. Indian zinga Miss World title la thei hnuhung ber chu Priyanka Chopra niin, kum 2000 khan Miss World atan hian thlan a lo ni tawh a ni. India hian Miss World ni thei panga lai a lo nei tawh a, Manushi Chhillar hi a parukna a ni.
Miss World thlanna hi China-a Sanya, Hainan province-ah neih niin, kar kalta Inrinni khan result hi puan a ni.
Khawvel ram hrang hrang 108 aiawh nula hmelṭha leh chhuanawm zingah Miss India chu a ber niin, 'Miss World 2017' title hlan a ni. Miss World 2016 winner Stephanie Del Valle chuan Chhillar hi crown a khum tir a, Miss Mexico Andrea Meza chu first runner niin, second runner up chu Miss England Stephanie Hill a ni.
Manushi hian Miss World ni thei tur hian zawhna ṭha takin a chang a, a nu chu a chhuan thu leh, a tana a hnathawhte chu suma lei theih loh khawp hial a nih thu a sawi a ni.
Question and Answer round-ah, "Eng hnathawk hian nge hlawh hnem ber se i tih? Enge a chhan?" tih a chhanna ṭha tak avang hian title hi a lak theih phah a ni.
Chhillar chuan, "An hnathawh aṭanga hlawh pek tur chu ni se nute hian an hlawh hnem ber ang. Midangte an hmangaihna leh an zahna avang hian zah an phu ber. Ka nu hi min fuih phurtu ber a ni a, tun hun ka thlen theih chhan anih avangin ka zah em em a ni" a ti. Sawi zawmin, "Ka nu hi kawng engkima min tichaktu a ni. Ka chunga a hnathawh zawng zawng hi suma lei theih pawh a ni lo" tiin a nu vanga hlawtlinna chang a nih thu a sawi uar hle.
Manushi Chhillar chuan tum pakhat a neih thu sawiin, "Medical zirlai ni mah ila thil tum lian tak pakhat ka nei. Chu chu Miss World nih hi a ni a, thil dang engmah ka ngaihtuah lo" tiin, Miss world nih chu a tumruh thu a sawi tel bawk.
Sushmita Sen, Aishwarya Rai leh Priyanka Chopra te hnungzuia Bollywood luhchilh a tum leh tum loh an zawhna chu, "Tunah chuan engmah ka sawi lawk thei lo, Bollywood luhchilh hi hlawhtlinna ber pawh a ni lo" tiin a chhang. Chhillar hian cardiac surgeon nih a tum a, thingtlang kilkhawra hospital din chu a tum pakhat zinga mi a ni bawk.
Haryana nula hian Miss World lo ni tawh - Reita Faria (1966), Aishwarya Rai (1994), Diana Haydon (1997), Yukta Mookhey (1999) leh Priyanka Chopra (2000) te hnung a rawn zui a ni. A hlawhtlinna vang hian lawmpuitu a ngah hle a, President Ram Nath Kovind leh Prime Minister Narendra Modi-te pawh lawmpuina leh duhsakna hlantu zingah an tel.
Tunge Manushi Chhillar?
Manushi Chhillar hi May 14, 1997 khan Haryana-ah a piang a, feet 5 leh inch 9-a sang a ni.
St. Thomas' School, New Delhi-ah lehkha a zir ṭhin a, tunah hian Bhagat Phool Singh Government Medical College for Women, Sonepat-ah a zir mek a ni. Modeling lamah sulhnu eng emaw zat a lo hnutchhiah tawh a, 'Beauty Queen' atan pawh thlan a lo ni fo tawh.
Lam lamah a tui hle a, National School of Drama-ah hun eng emaw chen a lo kal tawh ṭhin. Kumin June thlaa Femina Miss India thlannaah khan an state aiawhin a tel a, heta ṭang hian mi hriat a hlawh chho ṭan a ni. Femina Miss India 2017 atan thlan a nih bakah, Miss Photogenic atan thlan a nih bawk.
Femina Miss India 2017 atan thlan a nih hnu hian India aiawhin Miss World-ah hian a tel zui a, kum naupangte ni mah se mahni inrintawkna ngah tak a ni. Contestant zingah pawh a zahpuiawm lo hle a, a tir aṭanga a tawp thlengin ṭha takin a hna a hlen chhuak. People's Choice, Multimedia competitions leh Beauty with a Purpose competition-ahte award a dawng. Miss World atana thlan a nih hnuah khawvelin tunge a nih a ngaihven zui nghal a ni.
Amah hi chhungkaw pangngai taka aṭanga seilian niin, a pa Dr. Mitra Basu Chhillar hi Defence Research and Development Organisation-ah scientist a ni a, a nu Dr. Neelam Chhillar-i pawh associate professor niin, Institute of Human Behaviour and Allied Sciences-ah neurochemistry department head a ni.
Miss World 2017 – Manushi Chhillar, India
1st runner-up – Andrea Meza, Mexico
2nd runner-up – Stephanie Hill, England