Mizoramah TVS Motor Indin Thar Leh

Indian motor company lian, TVS chuan Mizoramah indin thar tumin nimin khan Bawngkawn, Aizawlah KC TVS showroom leh servicing centre an hawng.

Showroom hawngtu East Zone, National Sales manager Ajay Gupta chuan an company-in hma a sawn zel tih sawiin, Mizoramah a tharin hma an la a, KC TVS inhlanna leh inpekna a ropui a, Mizote tan malsawmna an nih ngei a beisei tih a sawi.

May khan TVS Motor Company-in KC TVS hnenah Mizoram dealer nihna pe felin, October 10 aṭangin an hralh ṭan a, official-a showroom hawn a nih thlengin TVS-in lirthei ke hnih nei an siam chi hrang hrang 210 an hralh chhuak tawh a ni.

Showroom hnuaiah servicing centre bunin TVS North East Area manager Artiman Chandra chuan a hawng nghal a, company duh dan mila kalpui a nih thu a sawi.

TVS lirthei siam chhuahte hi India ram mai ni loin Asia, Africa leh Latin America-ah thawn chhuah a ni a. Thla liam ta October chhungin India ram chhungah 2,75,934 an hralh a, company hrang zinga lirthei ke hnih nei hralh tam pathumna an ni.

KC TVS Dealer principal Kevin Vanlaltlana chuan dealer an nih chhan sawiin, Indian company a nih bakah Mizoten TVS lirthei an duh a, Ntorq scooter bakah Apache leh Ronin motorcycle te hi Mizote duh tur chi vek a ni hlawm a, theihtawp chhuahin a ṭha thei ang bera kalpui tumin hma an la tih a sawi.

CK Hyundai showroom ni ṭhin Bawngkawn, Aizawlah KC TVS hi an inbun a, TVS company-in lirthei ke hnih nei a siam chhuah chi hrang hrang, Mizorama la rawn lut ngai lote nen lei theih turin an chhawpchhuak a ni.