Ka ro tam zawk midang tan ka pe ang : Jeff Bezos

Amazon dintu, Jeff Bezos chuan a hausakna tamzawk chu a dam laiin midangte tan a pe dawn tih CNN-in an kawmnaah a sawi.

Bezos hi hausak lamah khawvelah palina a ni mek a, a hausakna hlutzawng hi USD tld 124.1 vel niin Forbes chuan a tarlang.

CNN-a Chloe Melas-in a kawmnaah, Bezos chuan a thil neih te chu charity tan hlan a tum tih a sawi a. Heng a sum tam zawkte chu sik leh sa inthlak, climate change bakah, khawtlang leh politics-a mihring inkar zau zel siamṭhatna tura beitute hnenah hlan a rilruk tih a sawi.

Midang tana luanchhuah, Philantrophy hi thil harsa a ni tiin, "Kan pawisate daihzai taka semchhuah a nih theihnan ruahmanna kalpui mek a ni," a ti

Kum 2020 khan Bezos chuan kum 10 chhunga USD tld 10 semralna tur, Bezos Earth Fund chu scientist, activist leh non-government organization hnenah khawvel chhe zel tur venna atan a thawh dawn tih a lo puang tawh a, tun thleng chuan la kalpui lo mah se, mi hausa tawntawte chu a hmalaknaah ke rawn pen turin a sawm zui bawk.

Hei bakah zaithiam Dolly Parton chu 'Bezos Courage and Civility Award' hlan a ni a, chawimawina hian USD mtd 100 a kengtel.

Bezos hian kum 2021-a Amazon thuneitu ber nihna aṭanga a inhnuhdawh hnuah, Andy Jassy chuan thlakin company-ah hian 10% share a nei mek a, Washington Post leh aerospace company Blue Origin neitu a ni bawk. Khawvel pa hausa palina a la ni phak tho a, Elon Musk (USD tld 200), Bernard Arnault, Louis Vuitton neitu (USD tld 175) leh India mi, Adani Group chairman, Gautam Adani (USD tld 147)-te hnuaiah a awm.