PRAISE ON 2017 Zanin aṭangin Grand Finale ṭan dawn
'Praise On 2017' chu a hmawrbawk a hnai ta a, zanin aṭangin Grand Finale intihsiak neih ṭan a ni ang.
September thla aṭanga neih ṭan he 'Fakzai Hunpui' hi Synfo buatsaih niin, KṬP Branch leh Bial a duh apiang tel theihna a ni. Group Zai intihsiak final hi zanin dar 7:30 aṭangin Khatla Kohhran Hall-ah neih a ni ang a, Zonet leh LPS-a 'Hruaina Eng' channel-ah live a ni ang.
Grand Finale zan khatnaah hian Praise On 2016-a lo tel tawh - Zorina, Arini leh Cindy te chu an zai dawn a, anni bakah hian Zarkawt Branch leh Nursery Veng Branch aṭangin Group zai ngaihthlak tur a awm ang. Khatla Branch atangin Musical Skit en tur a awm dawn bawk.
Zanin hi 'Kristian Hla Bu Zan' niin, hla sak tur thlan theih hi pali a awm a, Mizo irawm chhuak pakhat, Zosap, Pastor leh Upate lehlin hla pakhat ṭheuh an sa ang. Zosapthara (E. Rowlands) phuah, 'Engkim kan hmuh te hian an fak a che' tih hla te, EE Hewitt hla, Rev. Bankuaia-a lehlin 'Vawiin chuan ram nuam tak' tih leh, R Dinga leh Lalmama-te'n JR Clements hla an lehlin 'Ram Ni tla ngai lo' tih te an sa ang a, hei bakah hian Upa Rokunga hla phuah 'Aw nang kan Lal, Kan Pathian' tih hla hmangin an inel dawn bawk.
Grand Finale zan hnihna hi November 23, Ningani zanah neih leh tur a ni a, hetah hian mahni hla chuam sak tur a ni dawn thung. November 24, Zirtawpni zanah a kharna leh result puanna hun hman a ni ang. Praise On hi Mahruaiin a host a, Mavuana, Tekawka leh Liandingpuii te chu endiktu an ni. A hmunah hian projector-ah en theih a ni a, Hall chhunga lut tur Branch aiawhte tan entry pass siam a ni a, a hmunah lak tur a ni.
Praise On Final Round-a inlan turte -
1. Armed Veng Branch/Armed Veng Bial
2. Chawnpui Branch/Chawnpui Bial
3. Chanmari Branch/Chanmari Bial
4. Dam Veng Branch/Venghnuai Bial
5. Dawrpui Vengthar Branch/Dawrpui Vengthar Bial
6. Electric Veng Branch/Electric Veng Bial
7. Govt. Complex Branch/Zonuam Bial
8. Kanan Branch/Vaivakawn Bial
9. Tlangnuam West Branch/Tlangnuam Bial
10. Tuikual North Branch/Tuikual Bial