Billboard 200 Album Chart-ah 'Reputation' a sang fal Taylor Swift-i'n record thar a siam leh ta

Rinlawk ang ngeiin Taylor Switf album "Reputation" chu hralh a kal rem rem hle a, Billboard 200 Album Chart-ah pakhatna a rawn luah nghal. Taylor Swift chu kumin chhunga album tichhuak tawh zingah, kar khat chhunga album hralh hnem ber niin, record thar a siam leh ta.

Taylor Swift album thar 'Reputation' hi November 10 khan tlangzarh a ni a, kar khat lek chhungin US-ah ringawt copy maktaduai 1.238 hralh chhuah a ni. He album hian tlangzarh a nih hma hauh aṭangin ngaihven a hlawh a, tunah pawh a boruak a la lian hle. Kumin chhunga album tihchhuah tawh zingah hralh kal ber a nih mai bakah hian, kum 2015 hnua album chhuak tawh zinga kar khat chhunga hralh chhuah hnem ber record a ni nghal bawk.

Swift hian Billboard 200 Album Chart-a pakhatna hauh thei album panga a neihna chiah a ni a, '1989,' 'Red,' 'Speak Now' leh 'Fearless' album te khan pakhatna hi an lo luah tawh a ni. 'Reputation' hian tehna hrang hrangah pawh dinhmun sang ber a luah vel vek a, traditional album sale, track equivalent album (TEA) leh streaming equivalent album (SEA)-ahte pawh a hit ber a ni fai vek.

Hei mai hi a la ni lo, album tihchhuah tawh zawng zawng zinga kar khat chhunga copy maktaduai thum hralh tling thei zingah a tel a, hetiang tithei hi Dutch singer Nielsen leh Adele te chiah an awm. 'Reputation' album hi a digital copy pawh hralh a kal hle a, copy 709,000 vel zet hralh chhuah a ni tawh.

Tun ṭum chart-a pahnihna hauhtu chu Sam Smith a ni a, a album 'The Thrill of It All' chu kar liamta chhung khan copy 66,000 hralh chhuah a ni. Pathumna chu Chris Brown niin, 'Heartbreak on a Full Moon' album a la hlawhtlinpui zui zel. Post Malone, Ed Sheeran, Post Malone te chu top 10 zinga hming langsar an ni a, People Maga­zine-in kumin chhung atana 'Sexiest Man Alive' atan an thlan Blake Shelton hming a lang bawk.

Billboard 200 Album Chart
1. Reputation
- Taylor Swift (1,238000)
2. The Thrill of It All
- Sam Smith (66,000)
3. Heartbreak on a Full Moon
- Chris Brown (51,000)
4. Stoney
- Post Malone (39,000)
5. Divide
- Ed Sheeran (39,000)
6. Without Warning
- 21 Savage Offset and
Metro Broomin (37,000)
7. Red Pill Blues
- Maroon 5 (36,000)
8. Synthesis
- Evanescence (34,000)
9. Live in No Shoes Nation
- Kenny Chesney (33,000)
10. Texoma Shore
- Blake Shelton (32,000)