Climate change-ah American-te an benghawng lo!

Paris Accord aṭangin US a inla chhuak a, hei hi a mawh lutuk lem lo niin a lang. An president Donald Trump hian Climate Change hi a vei lutuk lo niin a lang a, a hruai mipuite pawhin Climate Change lam hi chuti takin an hre lo khawp mai.

Tunhnaia Yale leh George Mason Uni­ver­sity-te-n American-te Climate Change chung­chang an hriat dan an lak khawmah chuan, America mipui tam tak hian Climate Change an hriat dan hi an hre lo ang reng hle! Chumi awmzia chu Climate Change chungchangah inzirtirna an nei ṭha tawk lo tihna a ni.

American mipui zaa 54-te chauhin Climate Change hi mihringte avanga thleng a ni tih an pawm a, a dang chuan an hre lo ve hle. Zaa 33-te chuan khuarel ve rêng emaw an ti a, Climate Change hi thil thleng ve tur rêngah an ngai. Nature Scientific Reports-in zirchianna thar ber a tihchhuahah chuan tun kum 150 chhunga khawvel lum lam 1°C-a a sanna chhan chu mi­hringte vang a ni, a ti.

Climate Change awm chhanah chiang lo hle mah se, American mipuite hian Climate Change hi an vei hle. Zaa 22-te chuan an veiin an lungkham hle tih an sawi a, kum 2015 March thlaa mipui ngaihdan lakkhawm ai kha chuan lungkhamtu hi a let ngawtin an pung tawh zawk.

Zaa 63-te chuan an vei ve tho tih an sawi a, 64% chuan Climate Change hian khawchin pawh nasa takin a nghawng tih an pawm a, 33% phei chuan nghawng a nei nasa hle tih an pawm.

Zirchiannaa mi zaa 42-te chuan global warming hian anmahniah harsatna a thlen tih an sawi a, kum 2015 March thlaa mi an zawhte aiin harsatna thlena ngaitu hi a letin an pung tawh zawk. A chhan ber nia rin chu America-ah hian hurricane a tleh ngun tial tial a, chu bakah ram kâng hi a kum têlin an buaipui nasa ta deuh deuh bawk.

Tuilian an tuar nasa tial tial a, khawlum lutuk pawh a thleng ngun tial tial a ni. Global Warming leh Climate Change hi American mipuite chuan mihringte hian an siam ṭhat theih an ring. American zaa 78-te chuan global warming nasa zel tur hi mihringte hian an timuang thei niin an ngai. Chutihlai chuan 5% chuan global warming nasa zel tur tihmuan hi a hlawhtlin tak tak theih an ring chauh thung a, a dang chuan global warming nasa zel tur hi mihringten vêng thei mah se, tihhlawhtlin tak tak, vên tak tak a nih erawh an ring lo thung.

Zaa 25 laite chuan tihhlawhtlin tak tak theih a nih an rin loh chhan chu mihring tam tak hian an nunphung leh mizia an thlak duh loh vang niin an ngai a ni.