Mumbai-ah Ed Sheeran a concert

Ed Sheeran chuan India-ah tour a rawn nei a, November 19, Pathianni zan khan Mumbai-ah concert ropui tak a nei.

Jio Gardens, Mumbai-a concert hi zan dar 8-ah ṭan a ni a, darkar khat leh a chanve hun a hmang. Tun hi India-a a rawn kal ṭum khatna a ni tawh lo a, a mikhual lo hle. Concert-ah hian a hla hit 'Shape Of You' chu thiam takin a sa a, a fan-te authawm a ring hle. Sheeran hian stage-ah 'Kurta' pawl a ha chhuak a, a hnuah Team India T-shirt a ha leh bawk. Boruak siam a thiam a, "I really like Mumbai" a tihte chu mipuiin an lawm hle. A concert chhhimtu hi mi 10,000 vel zet an tling.

Ed Sheeran hian tour nei tur hian kar kalta Zirtawpni khan India a lo thleng a, Inrinni zan khan Farah Khan chenna-inah hun hmangin, Bollywood lama milarte nen hun an hmangho. He hunah hian Shah Rukh Khan, Malaika Arora, Shahid Kapoor leh Janhvi Kapoor-te pawh an tel. British pop star Sheeran hian film industry lam pawh a ngaihven viau niin an sawi a, Bollywood lamah Shah Rukh Khan te nen an thawkho dawn te pawh a ni mahna.

Sheeran chuan, "Bollywood film hi ka lo thlir ve tawh ṭhin a, an hlate pawh ka lo ngaithla tawh ṭhin. Bollywood-ah hian tha thawh ve ngei ka duh hle a ni, Shah Rukh Khan hi ka ṭhian hnai tak a ni a, ani nena thawhdun hi ka chak a ni" tiin a sawi. India chu nuama tih thu sawiin, "Culture hrang hlak a ni a, ei leh in, a mi chengte leh thuam inbel thlengin a danglam. Mahse he hmun hi nuam ka ti hle a ni" tiin, India nuam a tih thu a sawi uar hle. Sheeran hi hmannni deuh khan thirsakawrin a chesual a, a concert neih tur ṭhenkhat pawh a cancel a ni. India-a tour a neih tur erawh a nghawng buai lo a, tluang takin concert a zo thei a ni. PR Worldwide leh BookMyShow ṭangkawpte chuan Sheeran hi an chahlut a, Autism Rocks Arena-ah concert nei turin Dubai a pan leh nghal a ni.