In-house Production film pathumna 'Brother Zova'

In-house Production feature film pathumna, 'Brother Zova' chu November 26, 2022 Inrinni zan dar 7:30 ah Vanapa Hall-ah release a ni dawn a, hemi zan hian ticket system in a duh apiang tan en theih a ni nghal bawk ang.

In-house Production hian feature film pahnih, 'Ka Bialnu' leh 'Driver Kima' tihte chu an lo tichhuak tawh a, film siamtute rin phak bak leh beisei ai nasa in mipuiin an hlut. OTT platform, Lersia Play-ah heng film pahnihte hi entu sing 3 chuang an awm tawh a ni.

Plot tlangpui
'Brother Zova' hi film hmasa lama ziaktu ngai, Samuel Pachuau in a ziak a, thingtlang unau inhmangaih takte chanchin, khawpui tlangval pakhat an lo ṭanpui avanga an duhdan loh deuha harsatnaa an intahluh dan, an harsatna karah thudik ril zawk, an unau tana thudik lungngaihthlak tak ni bawk si an hriatchhuahna thawnthu a ni.

A changtu lam
Lead role la tur hi Mizo model lar, Kimkimi Ralte; music lama sulhnu nei ṭha, G'nie bakah Tommy te an ni. Mizo Cinema lama kan hmelhriat lar tawh tak tak, Maruata, Adama, Pa Hruaia-te an awm dawn bawk.

Film 3 an siam tawhah, budget lian tham taka siam an la nei lo. Brother Zova hi an film siam tawh zinga budget sanna ber niin, Rs. nuai 8 chuang an seng a, chung zinga a tam ber chu cast & crew hlawhah a kal.

In-House Production neitu, Drew Pachuau chuan he film hi a direct leh a, camera leh editing a khawih. MZU Mass Communication department aṭangin MJMC chhuak mi paliin an pui bawk.

November 26 zana Vanapa Hall a Premiere tur hi a hmun ngeia en duh tan ticket hi pre-booking a tih theih. Nimin aṭang khan Evok, Tuikual, Vanapa Hall bulah a lei theih a, film tlangzarh zan hian a hmunah lei theihin a awm bawk ang.