Rockschool Awards Music Exam 2022 result a chhuak Henry Varte a ti ṭha

Rockschool Awards Music Exam 2022 Session A (May-Aug) result chu a chhuakkim leh ta. Mizoram music school hrang hrang aṭanga exam hmachhawntu, zirlai 47 awmin an zinga pali erawh an hlawhtling zo lo.

Classical Piano, Popular Piano, Electronic Keyboard, Drum, Popular Theory, Music Production, Electric Guitar, Bass Guitar-ah te exam hmachhawn an awm. Pass zingah hian zaithiam hriat hlawh Henry Varte pawh telin, Vocal Grade 8 Distinction-ah a pass. MYC Perhkhuang aṭanga rawn invawrh, Flora Saizikpuii pawhin Vocal Grade 5 Merit ah a pass bawk. Subject hawn thar Music Production (audio recording, mixing etc) pawh Ace Recording Studio neitu, Abraham Lalzuitluanga'n Grade 8-ah a pass bawk. Tun ṭumah hian Aizawl pawn lama music school RL Chords, Serchhip leh Bluemark Music Academy, Champhai aṭangin zirlai exam an awm a, Aizawl music school aṭangin Asapha, Handel, Forzando, Drop Doubt, Canorous, Mystique zirlai ten exam hi an hmachhawn bawk.

RSL Awards hian London-ah hmunpui an nei a, khawvel ram hrang hrangah inzarpharhin an hnuai aṭang hian Music mai bakah, Dance chi hrang hrang, Podcasting, Acting te pawh a exam theih a ni. Hripui len hnu hian exam dan chi hnih Face-to-face (examiner hi London aṭangin an lo kal ṭhin) leh Recorded Video Exam (Exam-na video thawn) hmangin exam buatsaih ṭhin a ni.

Tunah hian Session B (Oct - Dec) exam neih chhoh leh mek a ni a, zirlai 57 in Piano, Keyboard, Drums, Theory, Vocal, Music Production, Electric Guitar, Violin-ah te exam hi an hmachhawn a ni. Face-to-face exam hi November 24 leh 25 hian RSL Awards exam center, Mystique-ah buatsaih a ni ang.