Grammys: Beyonce-in nomination hmu hnem ber

Beyoncé chu 'Renaissance' nen ropui takin rimawi khawvelah a rawn let a, 2023 Grammy Awards-ah nomination pakua hmuin ani aia nomination hmu hnem an awm lo.

Beyonce hian record thar siamin, nomination 88 lai a hmu tawh. Grammy award dawng hnem ber hi Hungarian-British orchestral leh operatic conductor, Georg Solti niin, award 31 a la tawh a, Beyonce hian award 28 kawl mekin record dinglai khum theihna hun ṭha a nei dawn.

Kendrick Lamar chu nomination hmu hnem ber dawttu niin, category pariatah a hming a lang. Beyonce leh Lamar-te hian award ngaihhlut, album of the year erawh an la dawng lo. Album of the year dawng thei tura chhawpchhuah zingah Adele (30), Harry Styles’ (Harry’s House), Bad Bunny (Un Verano Sin Ti), Lizzo (Special), Brandi Carlile (In These Silent Days), Coldplay (Music of the Spheres,) Mary J. Blige (Good Morning Gorgeous , Deluxe) leh Mizote'n an hla tam zawk kan sakpui theih, ABBA album hnuhnung ber 'Voyage' pawh rinlawk loh takin a rawn lang.

Nomination hmu lo langsar zingah Ed Sheeran hming a lar ber a, a album pangana "=" chu eng category-ah mah a lan loh avangin sawi zui pawh a hlawh hle.

2023 Grammys hi Crypto.com Arena, Los Angeles-ah sem a ni dawn a, voting hi round hrang hrangah ṭhenin, October 13 aṭanga January 2023 thleng hawn a ni ang.