TBC-a hla thar 'Ka lawm e Isu'

TBC Zaithanpuia leh PBK Liankhuma-te chuan US-ah rawngbawlna an nei mek a, hetih chhung hian TBC-a hian a hun chep tak karah music video a peihfel der mai. A hla thar hi 'Ka lawm e Isu' tih a ni.

He hla hi C.Lalzarmawia phuah a ni a, a thu leh a thluk hi a nalh hle. TBC chuan, "He hla hi ka duh em em a, a thu a ṭhain belhchian a dawl hle. Ka thlarau nun pawh a chawm hle a, chutiang bawkin he hla ngaithlatu zawng zawngten tisa leh Thlarauah malsawmna an dawn hi ka duhthusam a ni" a ti. Phal taka a hla saktirtu chungah pawh thinlung takin lawmthu a sawi bawk.

Music video hi US state hrang hranga rawngbawlna an neih kar lakah a buaipui a, Edenthara Varte chuan rawngbawlnaah ngaiin video hi a thlawnin a siamsak a ni. Kings & Prophets-ah recording tih niin, music track hi L.K. Sailo kutchhuak a ni.

TBC-a chuan he fakna hla hi Pathianin hmang se, ngaithlatuten malsawmna lo dawng ngei se tih chu a duh ber a nih thu a sawi.