Miss World crown man a to

India chuan Miss World lal lukhum a kawl mek a, he crown hi $750,000 man zet niin, India pawisa chuan Rs. 4,86,15,375.00/- zet a ni!

Haryana nula Manushi Chhillar chu Miss World 2017 atan thlan a ni a, India-in kum 17 zet liam hnua hetiang dinhmun thleng thei a neih leh vawi khatna a ni. Manushi Chhillar hi Miss World 2016, Stephanie Del Valle chuan crown a khumtir a, a lukhum hi crystal hmanga siam niin, diamond leh sapphire hmanga chei a ni. He crown hi Miss Universe, Miss International, Miss Earth, Miss Grand International leh Miss Intercontinental-te aiin a to fal hle a ni.

Miss World crown man zat hi $750,000 a ni a, Miss Universe crown man zat $300,000 nen a inthlau hle. Miss Earth crown hlut zawng chu $150,000 a ni a, Miss Grand International chu $ 300,000 niin, Miss Intercontinental crown pawh $360,000 zet a ni. Miss Universe aiin Miss International crown man a to zawk a, $550,000 zet a ni. Pearl, gold, silver leh diamond hmang siam hian Miss World crown hlutna erawh a la pha lo hle a ni.

Role model Manushi Chhillar
CBSE topper Manushi Chhillar kha tunah chuan Miss World a ni ta a, mi ngaihven leh entawn ber a ni mek. A chettlatna hmun a piangah en bik a ni tawh a, miten a nun an zir a ni.

Chhillar-i nu leh pate hi scientist leh doctor an ni a, amah pawh lekha thiam tak a ni. New Delhi-a St. Thomas School school-ah a kal ṭhin a, CBSE examah English subject bikah topper a ni. Tunah hian Bhagat Phool Singh Government Medical College for Women, Sonepat-ah MBBS a zir mek bawk.

Chhillar chuan, "Thawrimna hi hlawhtlinna bul a ni a, chumi nei tur chuan taimak a ngai a ni. Mahni inrin tawkna kan nei tur a ni a, nitin mai hian mahni kan infuih thar ṭhin tur a ni" a ti. Zirlai ni chunga India aiawh tura a beih nasat thu a sawi bawk a, kum lama naupang zawkte tan chona nasa tak a siam sak ngei a beisei thu a sawi bawk.

Haryana Chief Minister Manohar Lal Khattar chuan an state tihmingṭhatu Chhillar hi inhmun bakah, cheng vaibelchhe 6 pek a nih tur thu Nilaini khan a puang bawk.