GN'R hla sa ṭhin - Guns2Roses lo zin dawn

December ni 8 khian Bawng­kawn Field-ah Royal Stag Aizawl Rock Fest a awm dawn a, he hunah hian Guns N' Roses hla saa zin kual ṭhin Guns2Roses chu London aṭangin an rawn tel dawn.

Guns2Roses hi GNR keh darh lai, kum 2002 khan London-ah din a ni a, member 6 an awm mek a ni a, tribute band ṭha ber pawla ngaih an ni a, Guns N Roses nen kum 2006, 2010 leh 2012-ahte an lo tour ho tawh a ni.

Guns N' Roses chu

Guns N' Roses kan hria a, khawvela rock band hlawhtling ber zinga mi an ni. Mizoten rock band ngainat zinga mi a ni. GNR hi American rock band niin, kum 1985-a indin an ni. Kum 1987-a an album tihchhuah 'Appetite for Destruction'-a an hla hit, “Sweet Child o Mine” phei chuan Billboard Hot 100-ah Number 1 a hauh rei hle a ni.

Axl Rose leh Slash-te vanglai, an band member an kim lai chuan khawvela album hralh hnem ber pawl panga ngawt an tichhuak hman. Heng albuma hla ṭhenkhat - Sweet Child O' Mine, November Rain, Welcome to the Jungle, Paradise City, Knockin' on Heaven's Door leh Don't Cry-te chu a lar vet vet hle.

Amaherawh chu an hlawhtlin vanglai takin band-in harsatna an tawk chho a, kum 1990 khan Steven Adler an hnawtchhuak a, a kum leh 1991 kha Izzy Stradlin chuan band hi a chhuahsan ve leh bawk. Kum 1993 khan an band member pawimawh ber pakhat Slash chuan a chhuahsan veleh a, hemi aṭang hi chuan GNR hi a kal mumal thei tawh lo a, Axl chiah hian a ho ta a ni. Kum 2016 khan Slash hian GNR hi a zawm thung.

Guns2Roses hi Mizoramah an lo kal dawn a, GNR lar vanglaia an hlate kha Aizawlah an rawn sa dawn a ni.