PRAISE ON 2017 Damveng Branch an thiam ber

Synfo buatsaih fakzai hunpui Praise On 2017 - KTP Group Zai Intihsiaka pakhatna chu Damveng Branch te an ni. Nizan khan result hi puan a ni a, lawmman sem a ni nghal bawk.

Damveng Branch hian Certi­ficate, Award leh Rs. 1,00,000/- an dawng a, pahnihna chu Chanmari Branch niin, Dawrpui Vengthar Branch chu pathumna an ni. Pahnihna leh pathumnate hian Rs. 50,000/- leh Rs. 30000/- an dawng bawk. Award siam a ni a, Armed Veng Branch chuan 'Best Combination Award' dawngin, 'Most inspirational Award' chu Muallungthu Branch hnenah hlan a ni. Lawmman hi Rev. B. Sangthanga, Synod Executive Secretary chuan a hlan.

Result puan leh lawmman semna hun hi Vanlalhruaii (Mahruaii) chuan a kaihruai a, Judge 3 - Mavuana, Liandingpuii leh Tekawka te an inlan. Guest judge atana sawm Thanzawna Tlau, R. Lalmalsawma, H. Lalrin­mawia leh Lallianmawia Tlau te an inlan bawk. Result puan zan hian Khatla Branch KTP-te'n Musical Skit an chang a, Praise On 2016-a pakhatna R. Lalrinmawii (Arini) a zai bakah, Mizoram Synod Choir-te an zai bawk.

Praise On 2017 intihsiak hi September thla khan ṭan niin, ni 26 - 30 chhung khan audition round neih a ni a, musical instrument tel loin an hla duh ber pakhat ṭheuh an sa a ni. Second round intihsiak chu October 11 khan ṭan a ni a, keyboard leh acoustic guitar hman phal a ni tawh. Second round patlangte hian November 2-3 zan khan intihsiak an hmachhawn leh a, music track hman phalsak an ni. Third round aṭang hian final lut tur thlan an ni a, November 21 leh 23 zan khan Branch 10-te chuan Khatla Kohhran Hall-ah intihsiakna an hmachhawn leh a ni.

Grand Finale-ah hian hla hnih an sa a, pakhat zawk chu Organising Commiittee-te'n an thlansak a ni. A zan khatna hi 'Kristian Hla Bu Zan' niin, hla sak tur thlan theih pali a awm a, Mizo irawm chhuak, Zosap, Pastor leh Upate lehlin aṭangin an duh ber an thlang a ni. Grand Finale zan hnihnaah hian an hla duh an sa thung. Zan khatna leh zan hnihna aṭang hian result hi siam niin, Damveng Branch-te an thiam ber a ni.

Damveng Branch aiawhte hi C. Lalrindiki, Van­lalhruaitluangi, Roluahkimi, Zothantluangi, C. Lalrinzuala, Lalbiakzama, H. Lalmalsawma leh Lalkross­mawia te an ni. Result puan a nih hnuah Damveng Branch te hi an zai leh bawk.

PRAISE ON 2017 RESULT
1-na : Damveng Branch
2-na : Chanmari Branch
3-na : Dawrpui Vengthar Branch
Best Combination Award - Armed Veng Branch
Most inspirational Award - Muallungthu Branch