Lammual-a inlan tur DJ Nina Suerte

December 1-2 hian Annual International Electronic Music Festival, 'Femme Razzmatazz' chu Lammual-ah buatsaih a ni dawn. Femme Razzmatazz hi Mizoramin International Elec­tronic Music Festival a thlen hmasak ber tur a ni a, he hunah hian Poland chhulchhuak DJ Nina Suerte chu a inlan dawn.

Ni hnih awh tur he festival-ah hian International DJ - South Africa mi Candice Redding leh, Poland aṭangin Nina Suerte te hi an perform dawn a, a nghah­hlelhawm tawh hle. DJ Nina Suerte hi hmeichhe DJ zinga boruak nei lian ber pawl a ni a, hnuhma ṭha tak tak a lo nei tawh. Nina hian music hmangin mipui pungkhawm hlim takin a lo lam tir tawh ṭhin a, tun ṭuma a lo kal tur pawh hi a phurawm tawh hle.

Nina Suertehi a tirah chuan make-up artist a ni teh daih a, Polish cosmetic University chhuak ngat a ni. Modeling lamah pawh sulhnu a lo nei ve nual tawh a, stylist a nihna kawngah hriat a hlawh viau bawk. Polish trance producer Tiddey nen an inzui chho a, music lam a luh chilh. Music a luhchilh hi a tisual lo hle a, Poland-ah chuan an DJ lar leh neih ṭhat ber pawl a ni der tawh. Mahni style hlawhtlinpui a nihna hi a fakawm a, mite ngaihnat a hlawhna ber pakhat a ni bawk.

Mizoten zaithiam eng emaw zat kan nei a, mahse professional DJ tia sawi tur erawh an la awm mang hauh lo. DJ-te hian sum an hailut hnem a, ngaihsan pawh an hlawh hle. Khawvela huap pawha lang phak DJ lo kal turte hian music lamah hmasawnna kawng khat tala a rawn thlen belh ngei pawh a rinawm. December 1-2 zanah Lammual, AR Cinema Hall hlui hmunah International DJ perform thlir tur a awm dawn e.