EXO-in Krismas special album tichhuak dawn
South Korean boy band, EXO chuan Krismas special album an tichhuak dawn a, December thla tir lamah tihchhuah a ni ang.
Exo hian nimin aṭang khan 'Exo Planet 4 - The ElyXiOn' tour an nei ṭan a, album an tihchhuah tur thu hi an puang zui bawk. SM Entertainment chuan Korean boyband-te'n album thar tihchhuah an tum thu hi official-in an puang tawh bawk.
EXO hian Krismas album an lo tichhuak nual tawh a, nikum khan 'For Life' an tichhuak. Hei bakah hian 'Sing for You' (2015), 'December' (2014), 'The Winter's Tale' (2014) leh 'Miracles in December' (2013) te an lo tichhuak tawh a ni. Album an tihchhuah mawlh mawlh chhan hi an fan-te Krismas thilpek an hlan venaah an ngaih vang a ni.
Kuminah pawh album hi an tichhuak leh dawn tih a chiang tawh a, tlangzarh hun tur erawh puan a la ni lo. Krismas album bakah hian album thar tur an buaipui mek bawk.