Praise On 2022 Mal zai intihsiakah Malsawmdawngzuali pakhatna

KṬP branch hrang hrang aṭanga mi 300 chuang telna, Praise On 2022 chu nizan khan zawh fel a ni ta a, intihsiak zingah Tlangnuam West nula, Malsawmdawngzuali (Ms-i) chu zaithiam berah thlan a ni.

Nizan khan Mission Vengthlang Presbyterian Kohhran Golden Jubilee hall-ah result puan leh lawmman semna hun hman a ni a, Praise on 2022 Branch KṬP Mal zai intihsiakah Malsawmdawngzuali (Ms-i) chu pakhatna niin, pahnihna chu Durtlang nula Lalramnunmawii (Mawitei) a ni a, pathumna chu Laipuitlang nula R. Lalnuntluangi a ni.

Pakhatna hi sum fai Rs 1,00,000 bakah citation leh trophy hlan a ni a, pahnihna hnenah Rs. 50,000 leh pathumna hnenah Rs. 30,000 hlan an ni a, an pahnih hian citation leh trophy hlan tel an ni. Top 10 zinga mi pasarih te chu Rs. 7,000 leh citation hlan ṭheuh an ni bawk.

Result puan zan hian Praise On Solo 2016-a pakhatna R.Lalrinmawii leh pahnihna Tv. Zorinsanga Sailo, Praise On Group Zai 2017-a pakhatna Dam Veng Branch, Praise On Band 2018-a pakhatna Electric Vengthlang Branch, Mizoram Synod Choir, Mission Vengthlang Band leh Praise on 2022-a pakhatnaa thlan takte an zai a ni.

Synfo leh Central KṬP thawk dunin an buatsaih, Praise on 2022 Finalist te hi an zai thiam tlang hle a, endiktute tan pawh thlan chhuah thiam harsa tak a ni. Top 3-a in hlang kai zo lo zingah hian zai leh musical instrument khawih thiam, intihsiakna neih lai pawha mipui lawm hlawh tak tak te an awm.

Kum 25 mi, Ms-i hian Elimination round-ah 'Mala awm loh hmunah' tih hla a sa a, 2nd round-ah 'Rorelna ni', top 50-ah 'Via Dolorosa', top 20-ah Kristian hlabu 132-na 'Enge ka rilru a mangan?', top 10 zan khatnaah Kristian hlabu 203 - 'A saw raltiang tlangah kraws hlun tak' tih leh zan hnihnaah 'Chatuan in' tih hla a sa. Mali hi aw chak tak nei, zai hem hem chi a ni a, final zan hnihna zawkah pawh a zai ṭha hle a; mipui kut beng thawm pawh a ring. Judge-te pawhin,"Zai thiam, in zir mi tak," tia an fak.

Pahnihna Mawitei hi aw puitling tawh tak, aw control thiam tak a ni. Intihsiakna hrang hrangah R&B lam leh soul lam a sa nasa a, Final round zan khatna 'Kristian hla bu zan' ah a hlan thlan a fuh lo deuha ngaih a ni a, a zan hnihnaah erawh a aw control thiam zia a rawn pho chhuak leh a, zai mi hlawhtling tak ni tura beisei sang, hmabak eng tak nei a ni.

Pathumna Tluangtluangi hi Praise on 2022 finalist zingah naupang berin, a aw hian mawi danglamna bik tak a nei. Final round zan hnihnaah khan a zai ṭha hle a; intihsiakna a hmuna entuten an beisei ruk ang ngeiin top 3-ah an in hlang kai thei ta a ni.