Kum 18 hnuah 'The Princess Diaries' an tharthawh leh dawn

Disney chuan romance leh comedy film ngainatute tan thuchhuah phurawm tak rawn tichhuakin, ‘The Princess Diaries 3’ chu kum 18 hnuah an tichhuak dawn tih an puang.

Part 3-a changtu turte hi tihchian la ni lo mah se, mi tam zawk chuan film hmasa lama lo inlan tawh Anne Hathaway, Julie Andrews leh Chris Pine-te hmel hmuh leh ngei an beisei. Anne leh Chris-te hian mi tam tak thinlung an hneh bakah inngaizawng inkawprem tak an nih avangin social media lamah pawh an pahniha chang dun leh tura duhtu thawm pawh a ṭhahnem hle.

Princess Diaries hi kum 2001 aṭanga tichhuak ṭanin, part 2 hi kum 2004 khan tlangzarh a ni. Kum 18 hnuah part 3 siam anih tur thu hi an puang leh ta a ni.