Taylor Swift ticket inchuh an tam; ticket hralh chhuah tihtawp phah!

Taylor Swift “The Eras Tour” ticket zuarchhuaktu Ticketmaster chuan nimin aṭang khan ticket hralhchhuah tura an ruahman chu lei duhtu an tam em avang leh, an siamchhuah zatin namen loha a daih tak si loh avangin hralh chhuak tura an ruahmanna chu an titawp.

"Ticket kalpui dan leh an mamawh zat pekchhuah tur kan daih tak loh vangin Taylor Swift ‘The Eras Tour’ ticket, vantlang tana zawrchhuah tura ruahman chu ṭhulh a ni," tiin company chuan social media-ah thuchhuah an siam.

November 15 aṭang khan Verified Fan pre-sale an neih chu beisei aia inchuhna a nasat avangin an website pawh a chhiat phah hial. Nov 18 aṭanga public sale thlengin a nghawng hi an tuar phah ta a ni.

Ticket zuarchhuaktu, Beverly Hills-a hmunpui nei Ticketmaster chuan sawiselna leh demna an tawhnate chhangletin, an company chuan "bot attack tam lutuk te, fan demand sang lutuk vanga site buai phahnate awmin, ticket lei tura diltu mi tld 3.5 chuang an awm," a ti.

“The Eras Tour” hian Ticketmaster record a lo siam chu khumin, Swift hian Nov 15 bikah ticket maktaduai 2 chuang a hralh a, zaithiam zingah hetiang zata tam hralhchhuak an la awm lo. Ticket an mamawh dan aṭanga chhutin Swift hi stadium 900 chuangah a zai a ngai dawn a, chawhrualin kum hnih leh a chanve chhung chu zantin show a neih a ngai dawn tihna a ni.