Khiangte Construction Ṭhazual Lengzem Chart roreltu Zaii Hauchhum "Hmangaihna ka hua"

Khiangte Construction Ṭhazual Lengzem chart thar berah a zai thiam zia in hrilh nawn ngai lo, Ṭhazual Award sem zawh taka Best Female Artist, Zaii Hauchhum chuan a hla sak "Hmangaihna ka hua" hmangin chart-ah ro a rel. 

Kum ṭha hmangtu Zaii hi Hmangaihnain a la kalsan lo tih rimawi khawvelah a rawn lantir leh a ni. Hla leh music buaipuitu hi Ṭhazual Award-a Best Songwriter Lengzem dawngtu RP-a Ralte a ni a, a thiamna hmangin a rawn kuai nalh leh hle. Videography hi Mike-a kutchhuak a ni thung.

'Millionaire Fanu' leh 'Vawi sawmli leh nga'
KR Robert ft Tuaisiala hla 'Millionaire fanu' pawhin chart-ah tlakhniam lam a pan thei meuh lo a, top 10-a hla daihrei ber zinga mi rawn ni phakin, pahnihnaah a rawn inhlangkai leh a ni. Grace 10:45 hla thar 'Vawi sawmli leh nga' chu chart a hmasawn chak ber zinga mi rawn ni phakin top 3-ah a rawn inhlangkai bawk.

Chart-a hla lang dangte
Ṭhazual Lengzem chart-a palinaah hian Krismas dawn hnaiha hla play zin ber pawl 'Thlasik rim' phuahtu Awmtea Polymer hla thar 'Vangpui' a rawn lang a, artist chhuak thar JOD hla 'Drama Lalnu' chuan top 5 a rawn khar.

Hei bakah Manuna, Tetei LS Tochhawng, Siampuii X Casper, Jt Production ft Rachel Lalnunkimi leh Sangpuii Hlondo & David Zawma-te chu top 10-a rawn langte an ni.