FIFA World Cup 2022 ropui taka khuhhawn a ni

FIFA World Cup 2022 chu Pathianni zan khan Qatar-a Al Bayt stadium-ah ropui taka khuhhawn a ni ta a, opening ceremony-a ṭhalaite sawizui ber erawh a thlengtu ram Qatar leh Ecuador-te inkhel lam ni loin K-pop band BTS member, Jungkook-a perform kha a ni.

Jungkook hian record thar siamin Korean act zingah World Cup Opening Ceremon-a perform thei hmasa ber leh awmchhun a ni nghal.

Jungkook hian FIFA hla thar, "Dreamers" chu Qatari singer, Fahad Al Kubaisi nen sa in, kumin FIFA World Cup chu thothang ṭha takin an hawng. Social media luah khattu a ni nghal a, a fans ṭhahnem takte chuan Jungkook an chhuanzia leh world cup hla zinga hla mawi ber tihte in an sawi hial. Kan kum mil zelin kan world cup hla mawi tihzawng erawh a danglam thei awm e.

Hollywood lemchanthiam, Morgan Freeman pawhin 'The Calling' tih thupui hmanga thu a rawn sawi. "Min ṭhendarhtu aiin min suihkhawmtu hi a chak zawk a ni. Tribe lian tak insuihkhawm kan ni a, khawvel hi kan khualbuk a ni. Kan ṭanho phawt chuan mi tupawh hi pumkhatin kan awm thei," tiin, "Soccer hian mipui leh ram a suihkhawm a. Beiseina leh inzahtawnna a keng tel bawk. Soccer hian khawvel a tizau a, kan game ngaihnat ber hmangin pumkhatah min siam a ni. Soccer vangin chanchin ngaihnawm tak kan lo nei tawh a, Qatar pawhin an nei ve dawn a ni," tia he infiamna hi mihring min ti pumkhattu pawimawh tak a nih thu a rawn tlangaupui zawh hnuah, FIFA World Cup Ambassador Ghanim Al Muftah-an a hnung a rawn dawl zui bawk a ni.

World Cup hmasa lama hla heng, Pitbull “We Are One”, Shakira “Waka Waka” leh Ricky Martin-a hla “La Copa De La Vida” te chu FIFA World Cup 2022 opening ceremony-ah hian an play bawk a ni.