Khelmual pawnah Ronaldo leh Messi bawk!

Footballer piang tawh zinga ṭha ber tih an sawia an hming kan lam rik tawh tur, Lionel Messi leh Cristiano Ronaldo-te chuan khelmual chhung leh pawn lamah record an siam chho mawlh mawlh a ni ber. World Cup ṭan hma ni chiah, Inrinni zan khan an pahnihin Louis Vuitton briefcase chunga chess an khel lai chu Instagram lamah an post ve ve a, social media khawvel a deng chhuak hneh hle. Ronaldo post hian nimin thleng khan like mtd 36 chuang a nei tawh a, IG-a like tu ngah ber dawttuah a rawn inhlangkai dawrh. Messi-a'n like mtd 28 chuang nei tling tawh bawkin, IG-a like tu ngah lamah pangana a rawn ni phak bawk.

Instagram-a mimal account-in an post zinga like ngah ber chu Egg Gang-in kum 2019, January thlaa social media vanga stress leh anxiety tuar mekte lamah an ṭanzia lantirna tura an post "world_record_egg," kha niin, nimin thleng khan he artui hian like mtd 56 dawn a nei tawh a ni.

Hetih lai hian, Ronaldo chuan Instagram-ah nimin khan followers mtd 500 a nei tling a, khawvelah ani aia followers ngah an awm lo. Khelmualah chuai lam panin sawiselna te pawh tawng fo ṭhin mah se, khelmual pawn lamah erawh a chet ṭhat a chhunzawm zel.