Power Rangers-a Green Ranger lema chang Jason David Frank a thi

Power Rangers season hmasa ber leh an chhuah ṭan tirha Green Ranger Tommy Oliver lema chang, Jason David Frank chu kum 49 mi niin Texas ah a thi. A thih chhan hi mahni intihlum niin report chuan a tarlang.

Frank-a manager, Justine Hunt chuan Pathianni khan Frank-a thih chungchang hi thuchhuah a rawn siam a, a thihchhan emaw a thih hun emaw sawi a lang lo thung. Hun harsa an tawh laia an chhungkaw inrelbawlnate zahsak turin a ngen.

Frank hi tunhm lama naupang leh ṭhalai te lawm hlawh em em, tun thleng pawh a en la hlawh, kum 1993-1995 inkara suahsualna hrang hrangte laka khawvel chhanchhuak tura tleirawl rual in'a an din 'Mighty Morphin Power Rangers' ah inlanin, Tommy Oliver (Green Ranger) angin a chang. 1995 a 'Mighty Morphin Power Rangers: The Movie' siam a nih khan White Ranger in a chang leh a, lead role-te pawh a chang chho a ni. Frank hi martial arts lamah a tui hle a, kum 2009-2010 khan mixed martial arts bouts ṭhahnem takah a lo inlan tawh bawk a ni.

TMZ chuan Frank nupui pahnihna Tammie Frank chuan August thla khan inṭhenna lehkha a thehlut niin a tarlang. Tammie Frank-i nen hian fa pakhat an nei a, a nupui hmasa Shawna Frank-i nen fa pathum an nei bawk.