Black Panther : Wakanda Forever pakhatna; khawvel pumah USD mtd 550 dawn lalut tawh

'Black Panther : Wakanda Forever' chuan box office lamah a chetṭhat chhunzawm zelin, khawvel pumah USD maktaduai 546 a lalut tling tawh a, US bikah mtd 258 leh rampawn aṭangin 288 a lalut a ni.

Ryan Coogler direct hi Hollywood film zingah kumina film sum lakluh tam lamah pariatna ni mekin, khawvel pumah pasarihna a ni bawk.

Box office Mojo-in a tarlan danin, MCU film 'Black Panther' film pahnihna hian kar hnih pawh a liam hmain USD mtd 500 chuang a lalut der tawh a, khawvel pumah USD tld 1 lalut theih turin dinhmun ṭha takah a rawn invawrh chho a ni.

'Black Panther : Wakanda Forever' hi November 11 khan theatre-ah tlangzarh niin, cancer vanga thi ta Chadwick Boseman inlan thei tawh lo mah se film hmasa lama role pawimawh la ho erawh an la inlan kim thawkhat hle.

"African culture darhzau tak hmangin midangin ram chhung thil hlu tak tak kan phochhuah phah a ni," tiin Black Panther lead star Lupita Amondi Nyong chuan a sawi.

Box office thawm a reh

Kar liam ta khan film liantham tlangzarh a awm lo a, Anya Taylor-Joy leh Nicholas Hoult channa horror comedy film 'The Menu' chuan USD mtd 9 lalutin pahnihnaah a rawn inhlangkai. Isua Krista nun leh a rawngbawlna chanchin tarlanna series 'The Chosen' Episode 1 leh 2 chu pathumna a ni. The Rock channa 'Black Adam' chu palinaah awmin, Julia Roberts leh George Clooney inlanna romance/comedy chuan top 5 a khar.

Box office top 5
1. 'Black Panther : Wakanda Forever' - USD mtd 69.8

2. The Menu - USD mtd 9

3. The Chosen Season 3 (Ep 1&2) - USD mtd 8.2

4. Black Adam - USD mtd 4.6

5. Ticket to Paradise - USD mtd 3.2