Miss Universe 2017 - Demi-Leigh Nel-Peters

Miss South Africa Demi-Leigh Nel-Peters chu Miss Universe 2017 atan thlan a ni. Miss Universe thlanna hi Pathiannni zan khan Planet Hollywood hotel-casino, Las Vegas-ah neih a ni.

Nel-Peters hi South African zinga hetiang din­hmun thleng thei pahnihna chiah a ni a, kum 1978 khan Margaret Gardiner chu Miss Universe atan hian thlan a lo ni tawh a ni. Kum 22 mi Demi-Leigh Nel-Peters hi Miss Universe 2016, Iris Mittenaere chuan crown a khum tir a ni. 66th Miss Universe pageant-a first runner-up chu Miss Colombia Laura González niin, Miss Jamaica Davina Ben­nett chu second runner-up a ni.

Final-ah hian Thailand, Sri Lanka, Ghana, Spain, Ireland, Croatia, Great Britain, USA, Brazil, Canada, Philippines, Vene­zuela, South Africa leh China nulate an inlan a ni. Miss Universe thlannaah hian ram hrang 92 aṭangin contestant an awm a, top 10-ah hian Thailand, Venezuela, Brazil, Canada, Philippines, Spain, leh United States nulate an lang.

Miss Universe atana thlan South Africa nula hian hna thawhna hmuna hmeichhiate dinhmun chawisanna atan pawimawh ber enge ni? tih zawhna chu ṭha takin a chhang. Nel-Peters chuan, "Hmun ṭhen­khatah chuan hmeichhiate hian mipate nena hnathawh inang leh thawh chhung inang rengah pawh kan hlawh tlem zawk ṭhin a, hei hi thil dik a ni lo. Mipa leh hmeichhia hlawh hi hnathawh inangah chuan a inzat tur a ni a, hei hi khawvel pumah hman a ngai a ni" a ti.

Tunge Nel-Peters?
Demi-Leigh Nel-Peters hi June 28, 1995 khan Sedge­field, Western Cape-ah a piang a, a pianpui hmei­chhia chu pianphunga rualbna lo a ni. Nel-Peters chuan a unaunu hian chona nasa tak a pek ṭhin thu leh, amah fuihtu ber pakhat a nih thu a sawi.

Nel-Peters hian South African 'Model and Beauty Pageant' title a kawl mek a, Miss Universe-ah hian an ram aiawhin a tel zui a ni. Miss South Africa 2017-ah a chawrchhuahna Western Cape aiawhin a tel a ni. Nel-Peters hi Miss World 2017 leh Miss Universe 2017-ahte an ram aiawh tura thlan niin, Miss World-ah erawh a inlan lo.

Nel-Peters hian thla khat liam ta khan beih a tawk a, Hyde Park-ah a car khalh lai lo tidingin mi tu tih hriat lohten an lo tibuai a, amah beitute hi bei letin a him thei hram a, ṭanpuitu a pun nghal a ni. Nel-Peters chuan hmeichhiate himna a ngaihpawimawh thu a sawi uar hle a, mahni invenna turin eng emaw tal tih theih an neih ve a ngai tih a sawi.

Nel-Peters hian tun hnai khan North-West Univer­sity aṭangin business manage­ment-ah degree a nei thar a, zirna lam­ah pawh mi chhuanawm tak a ni.