MDM-in T. Lalengzauva hnenah 'Lifetime Achievement Award' hlan dawn

Music Domain Mizo­ram (MDM) chuan hranghlui zaithiam, T. Laleng­zauva chu 'Lifetime Achieve­ment Award' a hlan dawn. He award hi zanina MDM leh RAIN Lunglei ṭang­kawp Lunglei Home, TNT, Theiriat-ah Music Charity Concert an buatsaih dawnan hlan a ni ang.

MDM chuan a hunlaia Zoram mai pawh ni lo, Zoram pawn Mizo hnahthlak awm tawhnaa lar em em mai, T. Lalengzauva hi rimawia a sulhnu ropui tak avangin chawimawina hi an hlan dawn a ni.

Upa T. Lalengzauva hi Nov 7, 1956 khan Leite-ah a piang a, an unau hi 7 an ni. Kum 1967 khan Leite aṭangin Hnahthialah an an pem a, mahse kum 1973 khan Leite-ah bawk hian an kir leh a ni. Kum 1981 khan Lunglei-ah an pem leh a, Farm Veng, Lungleiah an khawsa mek a ni.

Kum 1977 aṭangin Evangelist F. Laltuaia rawngbawlna a zui ṭan a, soloist a ni. Kum 1979 November thla khan AIR Aizawl-ah voice test a nei a, January 1980 khan a hla hmasa ber a record. Radio-ah hian hla 100 vel zet a dah tawh a ni. Hemi kum vek hian Otto Recording Studio-ah Cassette a siam bawk.

Cassette (album) hi 1980 - 2000 inkar khan 10 zet a tichhuak hman a, 'An dang chuang lo ve' tih chu mite hriat hlawh zual a ni. Krismas album pawh a tichhuak bawk. Hla pawh 10 vel chu a phuah tawh bawk.