Billboard 200 Album Chart Taylor Swift bawk a langsar
Billboard 200 chart-ah Taylor Swift chuan pakhatna a hauh leh a, a album thar 'Reputation' chu hralh a kal zui zel.
Swift album 'Reputation' hi November 10 khan tlangzarh a ni a, US-ah ringawt copy maktaduai 2 chuang hralh a ni tawh. Tlangzarh a nih aṭangin chart-ah hian pakhatna a luah nghal chat a, hun eng emaw chen chu dinhmun sang berah a la awm rih dawn niin a lang.
Rinlawk ang ngeiin Taylor Switf album hi hralh a kal a, kumin chhunga album tichhuak tawh zingah kar khat chhunga album hralh hnem ber record a ni. Kumin chhunga album tihchhuah zingah hralh kal ber a nih bakah hian, kum 2015 hnua album chhuak tawh zingah kar khat chhunga hralh chhuah hnem ber record a ni nghal bawk.
Tim McGraw leh Faith Hill album 'The Rest of Our Life' chuan pahnihna a hauh a, kar liam ta chhung khan copy 104,000 hralh a ni. Tun ṭum chart-a pathumna hauhtu chu Sam Smith a ni a, a album 'The Thrill of It All' chu a hlawhtlinpui zui zel. 'The Thrill of It All' hi kar hmasa khan copy 66,000 hralh chhuah a ni a, chart-ah pahnihna a ni. Kar liam ta chhung khan copy 58,000 zet chu hralh chhuah leh a ni bawk.
Palina chu Garth Brooks niin, November 14-a a tlangzarh 'The Anthology: Part I' album chu copy 53,000 hralh chhuah a ni. Krismas a hnai a, chart-ah pawh Krismas album-te an rawn lang leh ṭan tawh. American acappella group Pentatonix album 'A Pentatonix Christmas' chu kar liam ta chhung khan copy 47,000 hralh niin, album hralh tam lamah panga-na a ni. Pakhatna pawh lo hauh tawh Pink album 'Beautiful Trauma' chu paruknaah a awm bawk.
Billboard 200 Album Chart top 10
1. Reputation - Taylor Swift
2. The Rest of Our Life - Tim McGraw & Faith Hill
3. The Thrill of It All - Sam Smith
4. The Anthology: Part I - Garth Brooks
5. A Pentatonix Christmas - Pentatonix
6. Beautiful Trauma - Pink
7. Red Pill Blues - Maroon 5
8. Luv Is Rage 2 - Lil Uzi Vert
9. Divide - Ed Sheeran
10. Stoney - Post Malone