Ngaihven hlawh 'Hornbill Festival'

Ṭhenawm state Nagaland-ah khuan kum tin 'Hornbill Festival' hman ṭhin a ni a, hmarchhaka festival lian leh ngaihven hlawh ber pakhat a ni mek. Nagaland Tourism leh Art and Culture Department chuan he festival hi an buatsaih ṭhin a, kuminah pawh December thla hian hman a ni leh dawn. Festival hi December 1 hian ṭan a ni dawn a, Indian President Ram Nath Kovind chuan he hun hi a hmanpui dawn a ni. Ram hruaitu lu ber telna festival hi sawi nep theih a ni lo a, Prime Minister Narendra Modi meuh pawhin festival hi a lo hmanpui tawh avangin a lian ve tawk tih a chiang. Hornbill Festival hi ram chhung mai ni lo, ram pawn thlengin a la lar zual zel dawn niin a lang bawk.

Festival buatsaih dan leh kalphunga hi a fuh avangin a lar chak hle a, India rama Festival lar ber pakhat a ni der tawh. Mi tam takin he festival-a tel hi an chak a, zaithiam lar leh musician-te inlan chakna ber pakhat a ni tawh. Band lar tak takte an fuankhawm ṭhin a, zai leh lam ringawt ni lo, art leh culture lam thil chi hrang hrang phochhuah ṭhin a ni bawk.

A chhimtute mit leh beng tlaina tur thil chi hrang hrang chhawpchhuah ṭhin niin, Sketching, painting exhibition leh art competition te buatsaih ṭhin a ni.Thil chi hrang hrang hmuh tur a tam avangin scholar leh researcher-te'n an ngaihlu ṭhin hle. Kuminah hian World War II museum siam a ni dawn a, thil hlui ṭha tak tak phochhuah a nih dawn avangin a tlawhtute tana chhenfakawm tak tur a ni.

Festival hi Kohima aṭanga km 10-a hla Kisama-ah hman a ni dawn a, hemi atan liau liau hian 'Model Village' siam a ni. Kisama hi ‘Plastic Free Zone’ ah puan a ni bawk. Festival hian ngaihlut a hlawh ṭhin em avangin 'Festival of Festivals’ tia sawi a ni. Traditional dance, sport, Rock Music, Fashion show, Photography contest, Naga King Chilli contest, Hornbill Car Rally leh thil dang dang a awm dawn. International Rock Contest chu ngaihhlut ber tur zinga mi a ni a, Singapore aṭang pawhin band tel tur an awm.

Hornbill Festival hian ram chhung leh pawn aṭangin khualzin a hip hnem ṭhin hle a, kuminah pawh hian eng emaw zat an awm leh dawn. Union defence minister Nirmala Sitharaman leh Union Minister for Textiles Smiriti Irani te pawhin an chhim dawn a ni.

Festival hi kum 2000 aṭang khan hman ṭan niin, kum tin December 1-10 chhungin hman ṭhin a ni. Ni 10 chhung awh festival hi ram chhung leh pawn aṭangin mi tam takin an chhim leh tura beisei a ni.