'Thusawm pek' film khan Ka pa rinna a tichak: Fraser Heston

'Fraser Heston chu tunge a nih?' kan lo ti rilru a ni mai thei, mahse chhiartu tam tak hian tunge a nih hre si loin in hmu tawh ngei ang.

Kum 1956-ah khan Kristian film chuai tawh ngai lo tur 'The Ten Commandments' chu tlangzarh a ni a, kha film-a Mosia nautet lai lema chang kha Fraser Heston chu a ni.

Thla hmasa khan Fraser Heston hi New York Post-in an kawm a, Mizo mipui tam berin kan hmuh ve kha chuan nausen chauh a ni a, tunah chuan kum 65 lai a ni tawh a, 'The Ten Commandments'-a a inlan khan thla thum lek a la ni a, chhia leh ṭha hriatna pawh a la nei lo.

Faser-a pa hi Mosia puitlin hnu lema chang, a changtupa ber Charlton Heston kha a ni nghe nghe a, hei hi kha film ropui tak chanchin tingaihnawm zualtu pawh a ni. 

"Ka nu a rai tih a hriat khan,'Mipa a nih chuan, Mosia lemah a chang thei ang,'" tiin ka pa khan a sawi lawksa a ni, "Ka pian khan, ka nu telegram dawn hmasa ber chu 'Ka lawmpui a che, part a chang e. Love, C.B,' tih a ni a, chu telegram chu khawiah emaw ka la dahṭha reng a ni," tiin a sawi.

"Ka pa khan film a chan dawn khan Mosia lehkhabu pangate kha a chhiar nawn leh vek a, DeMille’(director) thawhpuite nen khan nasa takin an zirchiang bawk. 

"Ka pa rinna kha a tichak niin ka hria. A rinna kha chhunglam aṭanga a neih a ni. Tunlaia mi tam takin rinna an neihna, 'sermon' a ngaihthlak aṭangin a ni ve lo," tiin Fraser chuan a pa chungchang a sawi.

Mosian Pathian hnen aṭanga 'Thusawm pek' a lak behchhan film hi a awm nual tawh a, Kum 1956 hmalamah pawh khan tihchhuah a ni tawh a, a hnu lamah pawh pahnih emaw chu tihchhuah a ni tawh. Mahse, November 8, 1956-a tlangzarh 'The Ten Commandments' aia huhang ngah leh sawizui hlawh a la awm lo.

An channa hmun pawh a taka thil a thlenna hmun Aigupa, Sinai tlang leh Sinai Peninsula velah an chang a, director ropui Cecil B. DeMille film hnuhnung ber a ni nghe nghe.

Tunlaia Bible behchhan film an siam ṭhin dang ang lo takin Bible nen pawh he film hi a inmil hle a, Bible bakah  Dorothy Clarke Wilson lehkhabu 'Prince of Egypt', Joseph Holt Ingraham 'Pillar of Fire' leh Arthur Eustace Southon 'Eagle's Wings'-te aṭangin a scirpt an ziak a ni. 

Kum 1956-a film hlawhtling ber a nih bakah a hunlai khan kum 10 chhunga film sum lalut tam ber dawttua ngaih a ni bawk. 

Academy Awards nomination pasarih ngawt hmu mah se  Academy Award for Best Visual Effects (John P. Fulton, A.S.C.) chiah a dawng thung.

Tuipui sen vuak chah kha a hautak hle a, khami special effect siam tur khan  VistaVision chuan thla ruk lai hun an hmang. Hemi bakah hian 'special effect' dang tam tak sawi hlawh a awm nual.

'The Ten Commandments' film siamna atana an budget hi $makatduai 13 a ni a, a hunlai ngaihtuah chuan hei hi a turu hle. Tlangzarh a nih hunlai khan khawvela film siam hautak ber leh senso tam ber a ni.

Mipui lan tam ngaihna scene-ah khan a changtu pangngaite bakah midang 14,000 chuang lai an tel a, film chan chhung zawng khan ramsa 15,000 vel an hmang bawk.

The Ten Commanments-ah khan effect danglam tak tak leh sawi hlawh tak tak a tam. 

VistaVision chuan thla ruk lai Tuipui sen vuak chah scene siamna tur hian hun a hmang a, Aigupta-a Tuipui sen tak tak bula an chan leh Hollywood-a Paramount Studio-a an chan an dahkawp a ni.

Paramount Studio-ah hian tuizem lian tak chu 'U' pianhmanga siam hmanrua hmangin tuizem hi hmun hnihah an ṭhen a, hemi atan hian tui gallon 3,60,000 lai an hmang!

$mtd 13 senga siam ni mah se a hlawhtling hle a, theatre pariat aṭangin $mtd 10 a hmu chhuak nghal. $mtd 122.7 (initial release) lai a hmu chhuak a ni. Hei hi kum 2019-a pawisa hlutna nena khaikhin chuan $tld 1.15 ang hu vel lai a tling. Guiness World Records chuan theatrical exhibition bikah khawvela film hlawhtling ber pariatnaah a puang.