Call of the Blue-a tel tum 1,300 chuang tawh

India Yamaha Motor Pvt Limited chuan a vawi khat nan Mizoramah lirthei ke hnih nei hmanga intihhlimna leh inelna thianghlim 'The Call of th Blue' a buatsaih dawn a, tel tumin mi 1,300 chuang an inziak lut tawh.

Mizorama Yamaha two-wheeler dealer, Thansanga and Sons Auto Division chuan 'company lamin mi 1,000 tal tel turin bithliah an siam a, Nimin thleng khan mi 1,361 an inziak lut tawh," tih Vanglaini a hrilh.

November 26, Inrinni khian Tuirial Airfield, Aizawlah zing dar 10 aṭangin hun hman ṭan tur a ni. Tlankawng te reuh tea intlansiak (Gymkhana) leh intlanmuansiak hmangin inelna buatsaih a ni dawn a, lawmman ṭha tawk tak siam a ni ang.

Rimawi hmangin DJ-in mipui pung khawm a awi reng dawn a, Monster energy drink leh Yamaha thuam bakah India rama Yamaha-in a tihchhuah tawh lirthei ke hnih nei chi hran hran, hranghluite lung tileng tur RD 350, RX 100, RX 135 leh RX Z pho chhuah a ni dawn.

Thansanga and Sons Auto Division neitu Pu Robert Lalremruata chuan,"Cheng nuai 30 chuang ruahman a ni a, Yamaha sumdawnna tihlarna tur ni mah se tute tan pawh tel theih vek a ni. Mizoramah hetiang hun buatsaih a ni ve tur hi a lawmawm hle a, a hlawhtlin dan azirin company-in a lehpekah sum tam zawk ruahmanin pui lehzualin Mizote tan intihhlimna huaihawt zel a tum a. Tel turin tute pawh kan sawm vek a ni," a ti.

Telte hnenah a thlawna thil sem tur a awm avangin inziah luh a ngai a, a thlawnin a hmunah leh - https://www.yamaha-motor-india... ah hian inziah luh theih reng a ni.