Lammualah international DJ nen lam ang aw!

December 1&2 zan hian Mizoramin a la hmuh ngai loh international DJ pahnih hoin Lammualah 'International Electronic Music Festival' buatsaih a ni dawn a, inbuatsaihna peih thawkhat a ni tawh. He 'Femme Razzmatazz' hi luh man Rs 1,000/- a ni dawn.

Poland chhulchhuak DJ Nina Suerte leh South Africa lam mi Candice Redding-te an inlan dawn a ni.

Aizawl khawpui laili Lammualah ngei lam runpui buatsaih a ni dawn - tlai dar 6:30 aṭangin luh theih a ni a, college zirlai a hmuna ID nena lut tur tan kal hma a finthlak ang. Dar 7 aṭangin Mizo DJ neih ṭhatte an che ang a, hei pawh hi chhim tham a ni viau tawh ang - hei hi Nina Suerte leh Redding-te hian chhunzawmin zan dar 10:00 thleng an tâl dawn a ni.

DJ chu eng nge?
Disc jockey (DJ) hi rimawi awm sa (pre-existing recorded music) hmun leh hmuna chawhpawlh thiam sawina a ni ber a, tunlai khawvelah chuan an lar vet vet hle.

Khaw thlang ramah chuan 'live music tichhetu' ang hiala sawi an ni a, a chhan chu ṭhangtharin band tam tak aiin DJ hi an lawm tawh zawk a, an hlawh pawh a sang hle.

Electronic dance music khawvelah kan lut tawh a, DJ-te hlutna a sang zual zel. Tunlai rimawi khawvela inhnialna lian tak chu 'Band versus DJ' tih a ni.

Band hi rimawi tirimawitu ber ni mah se, DJ-te hi an awlsam a, an tunlai a, ṭhangthar duhzawngin an inher rem zung zung bawk. Mizoramah DJ hlutna kan la hre tawk lo a, DJ-in eng nge an tih theih chiah kan la hre meuh lo a, December 1&2 hian DJ ṭha kan hmelhriat dawn e.

DJ Nina Suerte
Polish star DJ Nina Suerte hian sulhnu a nei hraw viau mai. Polish cosmetic university chhuak Suerte hi hi a tirah chuan make-up artist a ni a, modeling lamah pawh a kal thui hle.

Polish trance producer Tiddey nen an inzui chho a, music lam a luh chilh. Poland-ah chuan an DJ lar leh neih ṭhat ber pawl a ni der tawh. Mahni style hlawhtlinpui a nihna hi a fakawm a, mite ngaihnat a hlawhna ber pakhat a ni bawk.

DJ Candice Redding
Candice Redding hi South African mi a ni a, he DJ hi electronic music producer a ni tel bawk. DJ lar tak tak - Martin Garrix, Steve Aoki, Dimitri Vegas & Like Mike, Kygo leh midang eng emaw zatte nan an thawkho tawh ṭhin. VH1 Supersonic, Sunburn Festival, EVC, Axe Boat Party, Nat Geo's Wild Wild Fest, Oktoberfest, Bengaluru Food Festival, Summer Splash Festival leh Muzik-ahte kan hmu tawh a, Bollywood-ahte pawh a lo inlan tawh.