United Nations Envi­ronment Programme (UNEP)-in a tarlan dan chuan India hi South Asia ram zingah boruak bawlhhlawh avanga sum hloh hnem ber a ni.
UNEP-in boruak bawlh­hlawh avanga sum hloh chungchang a tarlanah hian India chuan Rs. tluklehdingawn 1400 (Rs. trillion 1.4) a hloh a, chu chu USD tluklehdingawn 220 zet a tling a ni. South Asia leh South East Asia ramtena boruak bawlhhlawh avanga sum an hloh zawng zawng belhkhawm hi USD tld 380 zet a tling.
Khawvel pumah chuan China ramin sum a hloh hnem ber a, USD trillion 1 (tld 1000) deuh thaw a tling a, a dawt chu Organisation for Economic Corporation and Development (OECD) ramte (Eu­rope ram tam ber, North America ram te, Australia, New Zealand, Chile, Israel leh Turkey te hloh zawng zawng) sum hloh a ni. OECD ram tena boruak bawlhhlawh avanga sum an hloh zawng zawng hi USD tld 730 a ni.
Tun ang zela khawvel hi a kal chho a nih chuan boruak bawlhhlawh avanga ram hrang hrang­ten sum an hloh zawng zawng hi kum 2060 khi chuan USD trillion 25 zet a tling tawh dawn niin UNEP chuan a tarlang. Boruak bawlhhlawh avanga dam chin hun tur dam pha loa thih phah hi kum tin maktaduai 19 vel awm ziah anga chhut a ni bawk.
UNEP chuan hma­sawnna leh ṭhanharhna tak tak a awm loh chuan kan chênna lei hi kan thlah kal zelte tana luah tlak loh khawpa bawlhhlawh a ni thuai dawn a ni, a ti.