Dec 13-ah BTS member Jin sipaiah inziaklut tawh dawn

Korean band, BTS member zinga upa ber, Jin chu December 13 hian sipaiah a ṭang tawh dawn nia tarlan a ni. Jin hi Decemer thla hian kum 30 a tling dawn tawh a ni.

Jin hi Gyeonggi Province-a Yeoncheon County-a recruit training centre-ah inziaklutin, he hmunah hian kar nga chhung basic military training a nei phawt ang. Hemi zawh hian a official base turah dah a ni ang.

BTS member dangte chuan Jin sipaia lut tur hi an ṭawiawm dawn nia sawi a ni. Hetih lai hian Jin chuan an fan te, Army-te chu sipai a zawm ni hian recruit training centre-a kal lo turin a ngen. Hemi ni hian amah chauh ni lo, midang tam tak sipai zawm tur an awm dawn a, hei vang hian punkhawm chiam chu a hlauhawm thei zawk dawn a ni, a ti.

Jin hian October 29 khan a solo debut, single album 'The Astronaut' chu a lo tichhuak tawh a ni.

South Korea ram danah mipa, piangpunga mi pangngai, puitling chin chu thla 18 tal an ram sipaiah an ṭan ngei ngei a ngai. Jin hian kumin June thla khan sipaia ṭan hi a lo tum tawh a, mahse a member puite hian an tihkhawtlai tir zawk nia sawi a ni.