Taylor Swift tour ticket zuartu Ticketmaster buaina US Congress-in ngaihtuah dawn

Taylor Swift tour ticket hralhna buaipuitu, Ticketmaster buaina tawh chungchang chu US Congress-a upper house, Senate antitrust panel chuan a ngaihtuah dawn. Hearing neih hun tur erawh an la sawichiang lo.

Ticketmaster hian kar liam aṭanga Swift tour ticket a hralhchhuahnaah ticket lei tum an tam tak em avangin service lamah harsatna a tawk a, an website lamah te harsatna tawkin fan tam tak ticket lei thei loin an awm phah.

Taylor Swift chuan a hma pawhin Ticketmaster hnenah hian mi tam tham tak ticket lei tur an buaipui thei angem tih a team-te pawhin ṭum eng emaw an zawt a, an theih tur thu an sawi vek a ni, a ti.

Panel chair, senator Amy Klobuchar chuan, "Fee sang lutuk te, website buai te leh cancel tam lutukte hian Ticketmaster hi insiamṭhat leh changtlung zawka siam tumna lamah hmasawn a tum lo tih a tilang a ni," a ti. Live entertainment leh ticketing industry-a buaina awmin customer leh artist-te a nghawng theih dan chungchangah hearing hi an nei dawn tih a sawi a ni.

Hetih lai hian Ticketmaster chuan Swift Eras tour atana ticket presale chungchanga buaina awmna chhan chu demand a tam lutuk leh, hlawkna uma ticket zawrhchhawn tum ticket scalpter-te aṭanga bot tam lutuk vang niin an sawi.

Taylor Swift chuan kum nga chhunga a tour neih lehna hmasa ber tur, Eras tour neih tura ticket lei tum, a fan-ten harsatna an tawk chuan a rilru a tihhrehawm phah hle tih a sawi a ni.