Kris Wu, kum 13 tang turin hrem

Chinese court chuan Zirtawpni liam ta khan Chinese-Canadian pop star Kris Wu chu hmeichhe khuaikhem zawnga a chetna avangin kum 13 tan ina tang turin hremna a tichhuak.

Beijing’s Chaoyang District Court chuan kum 2020 khan pawngsual thubuaiah kum 11 leh thla ruk chhung tang turin a lo hrem tawh a, kum 2018-a hmeichhe pahnih hrai ruia kut a thlak avangin kum khat leh thla 10 chhung tang turin hrem belhna an tichhuak leh a ni.

South Korean group EXO member hlui kum 32 mi, Wu hian a performance, advertisement leh a sum lakluhah chhiah a lo awl ruk ṭhin avangin yuan maktaduai 600 (USD mtd 83.7) chawi tura hrem a lo ni tawh bawk.

Wu hi online lamah hmeichhiate chungah mawi lo taka a chet ṭhin avangin nikum August thla aṭang khan police kutah hian a lo awm tawh a ni. Wu hian hmeichhe naupang tak takte hna pek leh eizawnna dang ngaihtuah sak turin a lo intiam ṭhin a, hmeichhe ṭhenkhatte chu kum 18 hnuaia lamte niin police thuchhuah chuan a tarlang.

Pawngsual hi an ram danah chuan kum thum aṭanga kum 10 thleng taninah khung theih an ni a, a case a zirin thi tura hremna thlengin pek theih an ni. Wu-a thubuai pahnihna hi kum nga thleng tan theihna a ni.