Crash Landing On You star Hyun Bin leh Son Ye-jin ten fa an nei

Korean lemchanthiam nupa, Hyun Bin leh Son Ye-jin-te chuan November 27 khan an fa hmasa ber atan mipa an neih thu an puang. Crash Landing On You star-te hi kumin March thla khan an innei a, July thla khan nau an pai thu an puang leh. Son Ye-jin-i agency chuan naute leh a nu pawh ngaihtuahawm an nih loh thu an tarlang.

Son Ye-jin-i agency, MS Team Entertainment chuan Nov 27 khan thuchhuah siamin, "Vawiin khan Son ye-jin chuan fapa a nei a, a nu leh naute te hriselna pawh a ṭha e," an ti. Hyun Bin pawhin fa an nei tih a hriatin awih harsa a tih thu sawiin, "A tak pawh a la ang lo. Ka bula mite'n ka fa chu ka mit hmuhah an rawn pawm khan a tak ngei a nih thu min hrilh. Ka tan chuan malsawmna hlu tak a ni a," a ti.

Son Ye Jin leh Hyun Bin-te hi kum 2018-a action-thriller film 'The Negotiation' an chandun aṭang khan an inzui ṭan a ni.