NBA Youngboy-an a hla la tihchhuah loh USD mtd 100 in hralh phal

29th November, 2022

NBA YoungBoy, YoungBoy Never Broke Again tiha hriat bawk chuan a hla a la tihchhuah ngai loh pakuate chu USD mtd 100 vel zetin a hralh phal tih a sawi.

Kum 23 mi, American rapper chuan hard drive-a a hla la tihchhuah lohte chu USD mtd 100-in a hralh phal a, lei thei an awm a nih chuan rap a chawlhsan tur thu Instagram kaltlangin a tarlang. "USD mtd 100 in nei thei a nih chuan engtikah mah ka rap lai in hmu tawh ngai lo ang," a ti.

YoungBoy hian kuminah ringawt pawh project paruk zet a tichhuak tawh. Tunhnaia a album "Ma' I Got a Family"-a tihchhuah hnuah Jay-Z chu lehpelin Billboard 200-a hla ngah ber dinhmun a hauh. October 21 khan a project thar hi tichhuakin album-equivalent unit 37,000 a hmu chhuak.

Hetihlai hian, YoungBoy chuan tour kaltlanga USD mtd 15 hlawh tura an sawmna pawh a hnawl tih a sawi bawk.