Miss Croatia hluiin Qatar-a inkaihhruaina bawhchhia

Kumin FIFA World Cup a hmuna entute zingah a maksak zawnga che tawk leh mipui sing tel kalkhawm zinga lo langsar fal hi chu a awm loh theih loh.

Miss Croatia hlui, model Ivana Knoll pawh chung zingah chuan telin, Qatar-in dress code khauh tak a siam chu pawisa loin khelmual chhung leh pawn lam thlengin thawm a lo nei ve mek.

World Cup "hottest fan" tiha an sawi, Croatian model hi a taksa lang tam thuam a inbel avangin pawisa chawi leh tan ina khung thlenga hrem theih a ni dawn. November 27 zana Croatia-in Canada 4-1-a an hneh ṭum pawhin an dress code hi a bawhchhia a, November 23-a Croatio leh Morocco intum ṭum pawh khan hetiang bawk hian a lo che tawh.

Qatar-a tourism thuneitute chuan an ram lo tlawhtute chu tualchhung inkaihhruainate zah sak a, mipa leh hmeichhiate pawh vantlang hmunah taksa lan tamna thuamhnaw in bel lo turin an ngen. Ivana chuan dress code chungchanga inkaihhruaina an siam a chhiar hnuah a thinur zia rawn sawi mah se, thuneitute chuan a inthuamna chungchangah engmah thubuai an la siamsak loh thu a sawi.