Ben Affleck nena kan inṭhen khan, thi mai tura inngaihna ka nei : J Lo

Jennifer Lopez chuan Ben Affleck nen an inṭhen tirha a hla phuahte chu a perform duh loh thu a sawi. "Jenny from the Block" hitmaker leh Affleck-te hi an inhual hnuah kum 2004 khan an inṭhen a, kum 20 dawn kawppui dang an inneihsan hnuah kumin kumtir khan an innei leh a ni.

Kum 53 mi zaithiam hian, "Heng record-te hi ka sachhuak thei lo. Kan inṭhen khan ka tuar hle a ni. Kum 20 dawn liam taa kan inneih tur kan ṭhulh khan, ka damchhunga ka thinlung kehchhiat nasat ber ṭum a ni a, thi mai tura inngaihna ka nei. Kum 18 chhung chu ka ke pen hi a dik mawh hle," tiin Ben nena an inṭhenna chuan a rilru leh taksa thlengin nghawng a neih dan a sawi.

Jennifer leh Ben te'n kum 2004-a an inhualna an chhutchah hnuah, kum 2005 khan Ben leh lemchanthiam vek, Jennifer Garner-te chu inneiin, fa pathum Violet, Seraphina leh Sam-te an nei.

Hetih lai hian, Lopez chuan a pasal hlui Marc Anthony nen phir Emme leh Max an nei thung.

Lopez chuan an inhualna an chhutchah hma, kum 2002 khan Affleck-a pual hian "This Is Me... Then" tih hla chu a tichhuak.

Jennifer hian Ben nena an inkar a ṭhat chhoh tak zel vangin, album thar "This Is Me...Now" tihchhuah tumin studio lamah a insawrbing mek a ni.