Kar thum chhung pakhatna hauhtu 'Wakanda Forever'

30th November, 2022

Khawthlang lamin Thanksgiving holiday an hman karah Box office-ah thawm rawn nei lian an awm lem lo a, "Black Panther :Wakanda Forever" chuan a dinhmun ngai rawn chelh lehin, kar thum chhung a zawna roreltu a ni. Wakanda Forever hian theatre 4,258 aṭangin USD mtd 64 a hailut leh a, US bikah mtd 368, ram dangah USD mtd 300 chuang lalut bawkin, a sum lakluh belhkhawm hi USD mtd 675.6 a ni.

Budget sang beisei phak lo "Strange World"
Disney kutchhuak, "Strange World" pawhin North American theater 4,174 aṭangin USD mtd 11.9 a lalut a, ram danga a lakluhte nen kar liam ta chhung khan USD mtd 18.6 chauh a lalut. He film hi Thanksgiving laia chhungkua pawha en theih tura a siamtuten an ruahman niin, USD mtd 30-40 inkar lalut tura beisei ni mah se, an tum angin an che ṭha lo.

USD mtd 180 vel senna, Disney animation film “Strange World” hi tun kar chhoah entu an pung hluai te a nih lem loh chuan sum tam tak hloh tura rin a ni. Disney hian animation film-te hi an hlawhtlinpui ṭhin hle a, Frozen 1 leh 2 hlawhtling taka an tihchhuah hnuah, tunhnai khan "Lightyear" chuan USD mtd 226 chuang a lalut a, "Encanto" khan USD mtd 256 zet a lalut bawk. Mahse Strange World erawh hi chu USD mtd 100 vel hloh tura chhut a ni thung.

Glass Onion: A Knives Out Mystery ve thung
Knives out sequel, 'Glass Onion: A Knives Out Mystery' chu Netflix lamin film aṭanga an sum lakluh zat an tarlan loh avangin official box-office chart lamah telh a ni dawn lo a, an ticket hralhchhuah zat pawh chhut sak a ni dawn lo. Glass Onion hian theatre 689 aṭangin USD mtd 13 bawr vel an lalut a ni. Kum 2019-a Thanksgiving hun laia Knives Out khan tlangzarh karah USD mtd 41.4 vel a lakluh laiin a chhunzawmna hi chuan Covid-19 hripui len hmaa film kha chu a phak dawn lo a ni.

Korean War drama 'Devotion' chuan cinema 3,405 aṭangin USD mtd 9 a lalut a, horror-comedy film 'The Menu' chu panganaah awmin USD mtd 7.4 a lalut.

Box office top 5:
1. Black Panther: Wakanda Forever
2. Strange World
3. Glass Onion: A Knives Out Mystery
4. Devotion
5. The Menu