Kum 2022-ah India rama hausa zualte an hausak belh zel : Forbes data

Indian rupee hlutnain tlakhniam lam pan mah se, a hausa zualte erawh an hausak belh zel thung. Covid-19 hripuiin zawi muangin min kiam san zel a, India rama hausa tawntawte pawhin an sumdawnna lamah hlawkna an tel chho leh ṭan mek a ni.

India rama hausa ber leh dawttu, Gautam Adani leh Mukesh Ambani-te thil neih hlut zawng hi ramchhung hausakna aṭanga chhutin 30% a tling phak hial. Forbes zirchianna thar berin a tarlan danin, India mi hausa zual 100-te hlut zawng hi USD tluklehdingawn 800 chuang zet a kai tawh a, top 10-te hausak zawng belhkhawm pawh USD tld 385 vel niin report chuan a tarlang. India chuan tunhnai khan Britain ram chu lehpelin, khawvela economy lian ram pangana dinhmun a hauh tawh bawk.

1. Gautam Adhani hi kum 2021 chhung khan a hausakna chu a let thumin a pung hman a, India rama hausa ber dinhmun chu luah zuiin, khawvel mi hausa ber dawttu a ni tawh bawk a ni.

India rama lawngchawlhna hmun lian ber, Gujarat-a Mundra-a mi neitu, Adani neitu hausakna hlut zawng hi USD tld 150 hu zet a ni.

2. Asia khawmualpuia hausa ber nihna pawh lo chelh tawh, Reliance Industries chairman Mukesh Ambani chu pahnihnaah tla thlain, USD tld 88 vel nei anga chhut a ni a, kum hmasa lam aiin a hausakna hi 5% velin a tlahniam.

3. Avenue Supermarket, DMart neitu, Radhakishan Damlani chu pathumnaah rawn langin, USD tld 27.6 vel nei anga chhut a ni.

4. Khawvela vaccine siamchhuaktu company lian ber, Serum Institute chairman Cyrus Poonawalla chuan dawtin USD 21.5 vel nei ang chhut a ni. SII hian an thawhpuite nen Covid-19 vaccine an siamchhuak a ni.

5. HCL Technologies chairman leh Indian IT sector tana thawhhlawk tak Shiv Nadar chu panganaah awmin, USD tld 21.4 vel a nei mek. Zirna lam kaihhnawih thilah USD mtd 662 chuang a donate tawh a ni.

6. OP Jindal Group chairperson, Savitri Jindal chu top 10-a hmeichhe lang thei awmchhun leh politician ni mek a ni. A hausakna belhkhawm hi USD tld 16.4 vel niin, India rama hmeichhe hausa ber a ni a, hmeichhe billionaire awmchhun a ni bawk.

7. Sun Pharmaceuticals founder, Dilip Sanghvi chu pasarihnaah awmin, manufacturing facility 40 chuang neiin ram 100 chuangah an thawnchhuak tawh a ni. A hausakna hlutzawng hi USD tld 15.5 vel a ni

8. Ashok Leyland neitu, Parmanand Deepchand Hinduja chuan sumdawnna hrang hrang enkawl tawhin, kum 1914-a an din, Hinduja group chu a unaute Srichand, Gopichand, Prakash leh Ashok-te nen an enkawl mek a, an hausakna hlutzawng belhkhawm hi USD tld 15.2 hu a ni.

9. Textiles aṭanga cement thleng siamchhuaktu Aditya Birla Group chairman Kumar Birla chu pakuanaah awmin, USD tld 15 vel a nei. Birla hian kum 28 mi a nih lai, kum 1995-a a pa Aditya Birla a thih hnuah company hi a enkawl ṭan a ni.

10. Mizote pawhin company kan hriat lar, Bajaj chhungkua chuan tunah Bajaj Group hnuaiah network 40 chuang an nei mek a, an hausakna hi USD 14.6 vel zet a tling. Kum 96-a upa an chhungkaw sumdawnna hi kum 1926 khan Jamnalal Bajaj chuan Mumbai-ah bul a rawn ṭan. Tunah chuan Bajaj Auto hi khawvel pumah two wheeler leh three wheeler siam chhuaktu lian palina an ni phak tawh a ni.