Kim K leh Kanye West an inṭhen fel ta ; Kanye-a'n a fate chawmna thla tin USD nuai 2 pe dawn

Kim Kardashian leh Kanye West-te chu official takin an inṭhen fel ta. Kum 42 mi, SKIMS neitu leh kum 45 mi rapper-te chuan naupang enkawlna leh ro chungchangah inremna an siam thei tih khawthlang media-te chuan an tarlang.

Inremna an siamah, an pahnih hian an fate pali - kum kaw mi North, kum ruk mi Saint, kum li mi Chicago leh kum thum mi Psalm-te an enkawlnaah chanvo in ang an nei ang. Kanye hian Kardashian hnenah naupang chhawmdawlna atan thla tin USD nuai 2 a pek a ngai dawn a ni. Hei bakah hian an fate enkawlna, zirna leh venhimna kawnga an senso zahve a sen a ngai bawk ang.

Buaina inṭan chhoh dan
West leh Kim-te hi kum 2012 khan in 'date' ṭanin, kum 2014 khan an innei. Tluang taka an inneih hnuah, Kanye-a'n United States president inthlan chuh a tum aṭanga buaina hi rawn chhuak chho ṭanin, a campaign-naah an chhungkaw chanchin leh mimal chanchin vantlang hriatah a phawrh avangin an inkar hi an buai chho ṭan a ni. Kim chuan mipui hriatah a pasal chuan 'bipolar disorder diagnosis' a neih thu leh, an fans-te hriatthiamna leh khawngaih ngenna thuchhuah a siam ve zui bawk.

Kim chuan, "Inṭhen hi ka duh dan tak chu a ni. Court-in kan inneihna thuthlung a tihtawp tak avangin Kanye pawhin kan inkarah engmah a awm tawh lo tih a hriat chian ka ring a, kan fate tluang taka kan enkawl zel theihnan min puih theih phah zawk dawn a ni," tiin Kanye chu an inkar zah zo tawk loah a puh.

Sawi chhunzawmin, "Tluang taka inneih kha ka duhthusam chu a ni a, mahse kan inneihna siam ṭhat theihna kawng a awm tawh lo a ni. Kanye chuan min la pawmpui thei lo mah se, a hrethiam chho zelin ka hria. Court chuan 'single' nihna min pek hnuah ka nun bul ṭan ṭhain, kan chhungkua chuan hmalam pan zel kan thlang a ni," tiin hmalam pan zel chu an chhungkaw tana ṭha ber tur niin a sawi.